07.10.2026 | 23:48
Արթուր Դանիելյանը կալանավորվեց
Վրաստանը հայտարարել է ԱՄՆ-ի հետ հարաբերությունները վերականգնելու ուղղությամբ ձեռնարկված քայլերի մասին
Քաղաքականություն
12.08.2024 | 14:12
Վրաստանի իշխանությունները քայլեր են ձեռնարկել ԱՄՆ-ի հետ հարաբերությունները կարգավորելու և վերականգնելու ուղղությամբ, նույնն ակնկալում են նաև իրենց ամերիկացի գործընկերներից։ Այս մասին լրագրողներին հայտնել է երկրի վարչապետ Իրակլի Կոբախիձեն, հայտնում է Rustavi 2 հեռուստաալիքը։
«Անհրաժեշտ է վերականգնել հարաբերությունները (ԱՄՆ-ի հետ): Հարաբերությունների վերաբեռնման համար անհրաժեշտ է արդարություն, ճիշտ, ողջախոհ մոտեցում։ Մեր կողմից արդեն քայլեր ձեռնարկվել են։ Մենք սպասողական վիճակում ենք, սպասում ենք, որ պատասխան քայլեր կձեռնարկվեն ամերիկացի գործընկերների կողմից»,- ասել է Կոբախիձեն։
Կառավարության ղեկավարը չի հստակեցրել, թե կոնկրետ ինչ քայլեր են ձեռնարկել վրացական իշխանությունները ԱՄՆ-ի հետ հարաբերությունները վերականգնելու համար։
ԱՄՆ պետքարտուղար Էնթոնի Բլինքենը հուլիսի 31-ին հայտարարել է, որ Վաշինգտոնը որոշել է դադարեցնել Թբիլիսիին ավելի քան 95 մլն դոլարի չափով օգնության ծրագիրը՝ կապված Վրաստանում «օտարերկրյա գործակալների» մասին օրենքի ընդունման հետ։ Մինչ այդ էլ նույն պատճառով ԵՄ-ն որոշել էր սառեցնել 30 միլիոն եվրոյի փոխանցումը, որը նախատեսվում էր հատկացնել Վրաստանի պաշտպանության նախարարությանը։
