22.02.2026 | 17:28
Խոսակցություններ են տարածվում, որ մարտի 1-ից սկսած կանխիկ վճարումն ընդհանրապես արգելվելու է․ Բաբկեն Թունյանը պարզաբանում է
Թուրքիան հիմա էլ արգելափակել է մուտքը Roblox հարթակ․ իշխող ուժի պատգամավորը պահանջում է արգելել նաև Tik Tok-ը
Քաղաքականություն
08.08.2024 | 23:05
Թուրքիայի իշխանությունները, Instagram-ի արգելափակումից հետո, հիմա էլ արգելափակել են մուտքը դեպի Roblox առցանց խաղերի հարթակ։ Որոշումը կայացրել է Ադանայի դատարանը, ասվում է Թուրքիայի հեռահաղորդակցության վարչության (BTK) կայքում առկա տեղեկատվության մեջ։
Ըստ թուրքական լրատվամիջոցների՝ որոշման հիմքում եղել է «բովանդակության հայտնաբերումը, որը կարող է հանգեցնել երեխաների բռնության»։ Roblox-ը հայտնի խաղային հարթակ է, որը թույլ է տալիս օգտատերերին ստեղծել իրենց սեփական խաղերը: Esports.net-ի փոխանցմամբ՝ Թուրքիան աշխարհում հինգերորդն է Roblox խաղացողների թվով։
Այս քայլը վերջինն է թուրքական կառավարության կողմից սահմանված արգելքների շարքում: Անցյալ շաբաթ Թուրքիան արգելել է մուտքը Instagram սոցիալական հարթակ, իբր, երկրի «օրենքներն ու կանոնները» չկատարելու համար։ Այս քայլն արվել է այն բանից հետո, երբ թուրք պաշտոնյաներն Instagram-ին մեղադրել են պաղեստինյան ՀԱՄԱՍ խմբավորման առաջնորդ Իսմայիլ Հանիեի սպանությունից հետո ցավակցական գրառումներն արգելափակելու համար:
Անցյալ ամիս էլ թուրքական դատարանն արգելել է մուտքը պատմությունների փոխանակման Wattpad հարթակ:
Հիմնական ընդդիմադիր Ժողովրդահանրապետական կուսակցությունից (CHP) Ստամբուլի քաղաքապետ Էքրեմ Իմամօղլուն քննադատել է այդ քայլը՝ դա համարելով «անհավանական»։
«Նրանք, ովքեր կայացնում են այս որոշումները, մարդիկ են, որոնք անտեղյակ են նոր աշխարհին, տնտեսությանը և տեխնոլոգիաներին»,- նշել է նա:
Սոցիալական ցանցերի օգտատերերից մեկն էլ նշել է․ «Թուրքիայում հազարավոր մարդիկ այստեղ խաղեր էին մշակում: Նրանք այստեղից էին ապրուստ վաստակում և արտարժույթ բերում երկիր»։
Կայքերի մուտքն արգելելը Թուրքիայի կառավարության համար սովորական պրակտիկա է: Թուրքիան 2022 թվականին արգելել է առնվազն 137,717 կայք։ Բացի այդ, Թուրքիայի խորհրդարանի թվային մեդիայի հանձնաժողովի ղեկավար, իշխող «Արդարություն և զարգացում» կուսակցության պատգամավոր Հուսեյն Յայմանը պահանջել է արգելք սահմանել նաև TikTok հարթակի նկատմամբ։
«Մարդիկ, որոնք ինձ տեսնում են փողոցում, ասում են՝ «Եթե փակես այս TikTok-ը, կգնաս դրախտ»: TikTok-ի դեմ շատ լուրջ քննադատություններ և բողոքներ կան»,- ասել է նա՝ կոչ անելով TikTok-ին «որդեգրել հեռարձակման քաղաքականություն, որը համապատասխանում է Թուրքիայի բարոյական, էթիկական արժեքներին, ավանդույթներին և սովորույթներին»։
«TikTok-ի խնդիրը Թուրքիայի համար ազգային անվտանգության խնդիր է։ Որպես հանձնաժողով՝ մենք որևէ դիրքորոշում չունենք այն արգելափակելու վերաբերյալ, դա Տեղեկատվական և հաղորդակցության տեխնոլոգիաների մարմնի (BTK) պարտականությունն է։ Բայց եթե ինձ հարցնեք՝ որպես հանձնաժողովի նախագահի, քաղաքականությունն արվում է ազգի հետ միասին։ Մեր ազգը ցանկանում է, որ TikTok-ն արգելվի»,- հայտարարել է պատգամավորը։
Էմմա Չոբանյան
