22.02.2026 | 13:09
Երևանում սպասվում են տեղումներ՝ ձնախառն անձրևի և անձրևի տեսքով
Ինչ խնդրանք է Պուտինը Շոյգուի միջոցով փոխանցել Իրանին․ Reuters
Քաղաքականություն
07.08.2024 | 16:14
Ռուսաստանի նախագահ Վլադիմիր Պուտինը Իրանի գերագույն հոգևոր առաջնորդ այաթոլլա Ալի Խամենեիին խնդրել է զուսպ արձագանքել Իսրայելի կողմից ՀԱՄԱՍ-ի առաջնորդ Իսմայիլ Հանիեի ենթադրյալ սպանությանը, մասնավորապես՝ զերծ մնալ իսրայելցի խաղաղ բնակիչների վրա հարձակումներից: Ըստ Reuters-ի աղբյուրների՝ համապատասխան ուղերձը Խամենեին է փոխանցել ՌԴ Անվտանգության խորհրդի քարտուղար Սերգեյ Շոյգուն, որն օրերս այցելել էր Իսլամական Հանրապետություն։
Գործակալության զրուցակիցները նշել են, որ բարձրաստիճան պաշտոնյայի այցը Թեհրան Իրանին «զսպվածության անհրաժեշտությունը» փոխանցելու մի քանի միջոցներից մեկն էր։ Ո՛չ Կրեմլը, ո՛չ Իրանի ԱԳՆ-ն չեն արձագանքել գործակալության մեկնաբանության խնդրանքներին։
ՀԱՄԱՍ-ը հաղորդել է շարժման քաղբյուրոյի ղեկավար Իսմայիլ Հանիեի սպանության մասին։ Ըստ այդ տեղեկությունների՝ Հանիեն զոհվել է Թեհրանում իր նստավայրին իսրայելական հարվածի հետևանքով, ուր նա ժամանել էր՝ մասնակցելու Իրանի նորընտիր նախագահի երդմնակալության արարողությանը: Շարժումը Հանիեի մահվան համար մեղադրել է Իսրայելին և ԱՄՆ-ին՝ հայտարարելով, որ դա անպատասխան չի մնա:
