07.10.2026 | 23:48
Արթուր Դանիելյանը կալանավորվեց
Իսրայելն ԱՄՆ-ին տեղեկացրել է Իսմայիլ Հանիեի սպանությանն իր մասնակցության մասին․ WP
Քաղաքականություն
07.08.2024 | 14:38
Իսրայելական կողմը ՀԱՄԱՍ-ի քաղբյուրոյի ղեկավար Իսմայիլ Հանիեի սպանության մասին հաղորդումներից անմիջապես հետո ԱՄՆ-ին հայտնել է նրա մահվանն իր մասնակցության մասին։ Այս մասին գրում է The Washington Post-ը (WP)՝ հղում անելով իր աղբյուրներին։
Նշվում է, որ Իսրայելը պաշտոնապես հրաժարվել է մեկնաբանել նրա մահը։
Պարբերականի զրուցակիցների խոսքով՝ ամերիկացի պաշտոնյաները ՀԱՄԱՍ-ի քաղբյուրոյի ղեկավարի մահվան լուրին արձագանքել են «զարմանքով և վրդովմունքով»։
Միաժամանակ, Վաշինգտոնն Իսմայիլ Հանիեի մահը համարել է լուրջ հետընթաց Գազայի հատվածում հրադադարի շուրջ բանակցությունների ջանքերում։ WP-ն նշում է, որ մինչև նրա մահն ամերիկացի պաշտոնյաները կարծում էին, որ առաջընթաց են գրանցել այս ուղղությամբ։
Պարբերականը գրում է, որ ԱՄՆ պետքարտուղար Էնթոնի Բլինքենը ղեկավարել է դիվանագիտական արշավը Իրանի վրա անուղղակի ճնշում գործադրելու նպատակով։ Նա Կահիրեի, Բաղդադի և արաբական այլ մայրաքաղաքների բարձրաստիճան պաշտոնյաներին խնդրել է զսպվածություն ցուցաբերել պատասխան քայլերում, նշում է WP-ն։
Իսմայիլ Հանիեն սպանվել է Թեհրանում հուլիսի 31-ին։ Նա Իրան էր ժամանել նորընտիր նախագահ Մասուդ Պեզեշքիանի երդմնակալության արարողությանը մասնակցելո նպատակովւ։ Իրանի արտգործնախարարության խոսնակ Նասեր Քանանին հայտարարել է, որ Թեհրանն Իսրայելին կասկածում է ՀԱՄԱՍ-ի քաղբյուրոյի ղեկավարի սպանության մեջ։ Իսրայելը ո՛չ հաստատել, ո՛չ հերքել է իր մասնակցությունը։ Իրանի գերագույն առաջնորդ այաթոլլա Ալի Խամենեին «խիստ պատիժ» է խոստացել ՀԱՄԱՍ-ի քաղբյուրոյի ղեկավարի մահվան համար։
