Բլինքենը հայտարարել է, որ Գազայում հրադադարի շուրջ բանակցությունները վերջնական փուլում են

Իսրայելի և Գազայի հատվածի պատերազմի ավարտի շուրջ բանակցությունները մտել են «վերջնական փուլ»: Այս մասին հայտարարել է ԱՄՆ պետքարտուղար Էնթոնի Բլինքենը, գրում է The National-ը։

ԱՄՆ-ը, Եգիպտոսը և Կատարը ղեկավարել են բանակցությունները, որոնք ուղղված են Գազայում հակամարտությունը դադարեցնելուն և պատանդներին ազատ արձակելուն:

«Նախագահ Ջո Բայդենն այսօր խոսել է Եգիպտոսի նախագահ Աբդել Ֆաթահ ալ-Սիսիի և Կատարի Էմիր Շեյխ Թամիմի հետ։ Բանակցությունները հիմա հասել են վերջնական փուլ, և առաջնորդները պայմանավորվել են այս գործընթացն ավարտին հասցնելու հրատապության շուրջ։ Կարևոր է, որ բոլոր կողմերն աշխատեն՝ հնարավորինս շուտ համաձայնագիրը վերջնական տեսքի բերելու համար»,- ասել է Բլինքենը։

Տարածաշրջանը վերջին օրերին գտնվում է բարձր զգոնության վիճակում՝ Լիբանանում և Իրանում իսրայելական հարվածներից հետո, որոնց հետևանքով սպանվել են «Հըզբոլլահ»-ի բարձրաստիճան հրամանատար Ֆուադ Շուքրը և ՀԱՄԱՍ-ի քաղաքական թևի ղեկավար Իսմայիլ Հանիեն:

Բլինքենն ասել է, որ չնայած աճող լարվածությանը՝ «աշխատանքները շարունակվել են» հրադադարի հնարավոր գործարքի շուրջ: Նա հեռախոսազրույցներ է ունեցել տարածաշրջանային նախարարների հետ՝ փորձելով կանխել ավելի լայն կոնֆլիկտի զարգացումը:

«Մենք շարունակում ենք ինտենսիվ աշխատել Մերձավոր Արևելքում լարվածությունը թուլացնելու և հակամարտությունների տարածումը կանխելու համար»,- նշել է ԱՄՆ պետքարտուղարը՝ հավելելով, որ «սա վճռորոշ պահ է» տարածաշրջանի համար։

Նշենք, որ Հանիեի փոխարեն ՀԱՄԱՍ-ի քաղաքական ղեկավարի պաշտոնում նշանակվել է Յահյա Սինվարը:

«Նա եղել և մնում է հիմնական որոշողը, երբ խոսքը վերաբերում է հրադադարի պահպանմանը։ Ուստի, ես կարծում եմ, որ դա, անշուշտ, ընդգծում է այն փաստը, որ ինքը պետք է որոշի՝ արդյո՞ք առաջ շարժվել հրադադարի ճանապարհով, որն ակնհայտորեն կօգնի այնքան շատ պաղեստինցիների, որոնք հուսահատ կարիքի մեջ են՝ կանանց, երեխաներին, տղամարդկանց, որոնք հայտնվել են խաչաձև կրակի մեջ»,- հայտարարել է ԱՄՆ պետքարտուղարը։