Քամալա Հարիսը պաշտոնապես ԱՄՆ Դեմոկրատական կուսակցության նախագահի թեկնածուն է

ԱՄՆ գործող փոխնախագահ Քամալա Հարիսը պաշտոնապես առաջադրվել է որպես ԱՄՆ նախագահի թեկնածու Դեմոկրատական կուսակցությունից։ Առցանց քվեարկության ժամանակ նրան աջակցել է կուսակցության պատվիրակների մեծամասնությունը, հայտնում է The New York Times-ը:

Դեմոկրատական կուսակցությունը պետք է առաջադրեր իր նախագահի թեկնածուին օգոստոսի 19-22-ը Չիկագոյում կայանալիք համագումարում։ Այնուամենայնիվ, Ազգային կոմիտեն որոշել է առցանց քվեարկություն անցկացնել կուսակցության պատվիրակների համար համագումարից երկու շաբաթ առաջ, որպեսզի չկորցնի Օհայոյում իր թեկնածուին քվեաթերթիկում ներառելու փաստաթղթերը ներկայացնելու վերջնաժամկետը:

Համաձայն նահանգի գործող օրենսդրության՝ դրա ժամկետը լրանում է օգոստոսի 7-ին: Օհայոյի նահանգապետը վերջերս ստորագրել է օրենք, որով ժամկետը երկարաձգվում է մինչև սեպտեմբերի սկիզբ, սակայն փաստաթուղթն ուժի մեջ կմտնի մինչև սեպտեմբերի 1-ը, ուստի դեմոկրատները հույս ունեն խուսափել հնարավոր իրավական խնդիրներից՝ օգտագործելով վաղաժամ քվեարկությունը:

Հարիսը չի մասնակցել ներքին կուսակցական ընտրություններին, որոնք սովորաբար որոշում են պատվիրակների ձայները։

Մինչև հուլիսի 21-ը Դեմոկրատական կուսակցությունից առաջատար և գործնականում միակ թեկնածուն ԱՄՆ ներկայիս նախագահ Ջո Բայդենն էր։

Հունիսի սկզբին ավարտված կուկուսների և փրայմերիզի արդյունքում նա կարողացավ ապահովել գրեթե բոլոր 3,9 հազար պատվիրակների աջակցությունը, սակայն հունիսի 27-ին նա չափազանց անհաջող ելույթ ունեցավ հանրապետական Դոնալդ Թրամփի դեմ իր առաջին բանավեճում։ Երեք շաբաթ անց, կուսակիցների ճնշման ներքո, Բայդենը ստիպված եղավ հանել իր թեկնածությունը։