Եկատերինբուրգի «Կոլցովո» օդանավակայանում ռումբի մասին բղավոցներից հետո խուճապ ու հրմշտոց է սկսվել

Երկու մարդ է տուժել Եկատերենբուրգի «Կոլցովո» օդանավակայանում հրմշտոցի հետևանքով, որը հրահրել է ռումբի մասին ուղևորների բղավոցներն ու ամբոխի մեջ կրակոցները։ Ուրալի տրանսպորտի դատախազությունը ստուգումներ է իրականացնում։ Այժմ օդանավակայանն աշխատում է սովորական ռեժիմով, գրում է Կոմերսանտը։

Ըստ մամուլի ծառայության՝ օգոստոսի 6-ի գիշերը ավիաընկերությունների չվացուցակից շեղումների պատճառով օդանավակայանը միանգամից մի քանի թռիչք է ստացել արտասահմանյան հանգստավայրերից։ Անձնագրային և մաքսային հսկողության տարածքում մեծ բազմություն է գոյացել։ Այնուհետ, ըստ օդանավակայանի, «ուղևորներից մեկը խուճապ է առաջացրել», ինչը հանգեցրել է հրմշտոցի։ Երկու հոգի ընկել և վիրավորվել են, որոնց օգնություն է ցուցաբերվել տեղում։

«Սահմանապահները մի քանի րոպեում վերականգնել են կարգուկանոնը։ Ներկայում իրավասու մարմինների կողմից հետաքննվում են պատճառները, որոնք առաջացրել են իրավիճակը, նաև այն՝ արդյո՞ք դրանք դիտավորյալ գործողություններ են եղել։ Օդանավակայանը չի դադարեցրել աշխատանքը և աշխատում է բնականոն հունով»,- ասվում է մամուլի հաղորդագրությունում։

Տեղական E1 պորտալը գրում է, որ գիշերը օդանավակայան է ժամանել միաժամանակ երեք ինքնաթիռ, երկուսը՝ Թուրքիայից, մեկը՝ Դուբայից։ Անձնագրային հսկողության մոտ ուղևորների ամբոխ է գոյացել։ Տարածքը մարդաշատ է եղել և, ըստ ականատեսների, երեխաներ են ուշաթափվել։ Այդ ժամանակ ուղևորներից ինչ-որ մեկը գոռացել է՝ «ռո՛ւմբ»։ Ուղևորներից մեկը պնդում է, որ խուճապից հետո սկսել են գոռալ կրակոցի ու պայթյունների մասին։

«Փախեք, կրակում են։ Եվ ողջ ամբոխը սկսեց վազել»,-պատմել է նա E1-ին։

«Մեզ մոտ մարդիկ դուրս են վազել ոտաբոբիկ, առանց ուղեբեռների, երեխաները լացում էին։ Նման կատակասերներին պետք է պատժել»,- ասել է մեկ այլ ուղևոր։