Առաջարկվել է Հունգարիային ժամանակավորապես բացառել Շենգենյան գոտուց՝ ռուսների համար վիզաների պարզեցման պատճառով

Եվրախորհրդարանն առաջարկել է կասեցնել Հունգարիայի մասնակցությունը Շենգենյան գոտուն այն բանից հետո, երբ Բուդապեշտը որոշել է դյուրացնել վիզային ռեժիմը Ռուսաստանի և Բելառուսի քաղաքացիների համար։ Նման պահանջով նամակ է ստորագրել եվրոպացի 70 պատգամավորներից բաղկացած խումբը, գրում է Politico-ն։

«Մենք կոչ ենք անում Եվրահանձնաժողովին շտապ միջոցներ ձեռնարկել Հունգարիայի որոշումը հետաքննելու համար, քանի որ այն կարող է սողանցք դառնալ և պոտենցիալ վտանգի տակ դնել Շենգենյան գոտու ընդհանուր գործունեությունն ու որպես քաղաքացիների համար անվտանգ տարածքի՝ նրա դերը»,- ասվում է փաստաթղթում:

Եթե Հունգարիայի կառավարությունը հրաժարվի փոխել իր վիզային քաղաքականությունը, Եվրահանձնաժողովը և ԵՄ բոլոր երկրները «պետք է կասկածի տակ դնեն Հունգարիայի ներկայությունը Շենգենյան գոտում՝ ներդնելով եվրոպական քաղաքացիների պաշտպանության նոր միջոցներ, այդ թվում՝ նոր հսկողություն Հունգարիայի սահմաններին»։

Հուլիսի սկզբին Հունգարիան ռուսաստանցիներին և բելառուսներին ընդգրկել է «ազգային քարտի» ծրագրում, որը թույլ է տալիս նրանց աշխատանքի անցնել ցանկացած ոլորտում, տեղափոխել իրենց ընտանիքը և երեք տարի հետո ստանալ երկրում մշտական բնակության թույլտվություն։ Ըստ Deutsche Welle-ի՝ դա տեղի է ունեցել երկրի վարչապետ Վիկտոր Օրբանի և ՌԴ նախագահ Վլադիմիր Պուտինի՝ Մոսկվայում կայացած հանդիպումից հետո։

Մինչ այս ծրագիրը հասանելի էր միայն Ուկրաինայի և Սերբիայի քաղաքացիներին։ Բացի Ռուսաստանից և Բելառուսից՝ այն տարածվել է նաև Բոսնիա և Հերցեգովինայի, Մոլդովայի, Հյուսիսային Մակեդոնիայի ու Չեռնոգորիա քաղաքացիների վրա։ Գարնանը Հունգարիայի կառավարությունը հայտարարեց, որ ակնկալում է ընդունել մոտ 65 հազար հյուր աշխատողների՝ իրենց ընտանիքներով։