ԱՄՆ-ը լրացուցիչ ռազմական ուժեր է տեղակայում Մերձավոր Արևելքում

ԱՄՆ-ը լրացուցիչ ռազմական ուժեր է տեղակայում Մերձավոր Արևելքում որպես պաշտպանական միջոց՝ տարածաշրջանում լարվածությունը թուլացնելու համար։ VOA-ի փոխանցմամբ՝ այս մասին հայտարարել է Սպիտակ տան ներկայացուցիչը:

Տարածաշրջանում լարվածությունը սրվել է չորեքշաբթի Իրանի մայրաքաղաք Թեհրանում ՀԱՄԱՍ-ի առաջնորդ Իսմայիլ Հանիեի սպանությունից հետո, ինչպես նաև մեկ օր անց Լիբանանի մայրաքաղաք Բեյրութին Իսրայելի հարվածից հետո, որի հետևանքով սպանվեց «Հըզբոլլահ»-ի բարձրաստիճան զինվորական հրամանատար Ֆուադ Շուքրին: Երկու խմբավորումներին էլ աջակցում է Իրանը։

Աճում են մտավախությունները, որ Իսրայելի պատերազմը Գազայում, որը սկսվել է անցյալ տարվա հոկտեմբերին, կարող է վերածվել ավելի լայն մերձավորարևելյան հակամարտության: Իրանը և ՀԱՄԱՍ-ը Հանիեի սպանության մեջ մեղադրեցին Իսրայելին և «Հըզբոլլահ»-ի հետ միասին խոստացան վրեժ լուծել: Իսրայելը ո՛չ ստանձնել է, ո՛չ էլ հերքել է սպանության համար պատասխանատվությունը:

Ուրբաթ Պենտագոնը հայտարարեց, որ տարածաշրջան կուղարկի ավելի շատ կործանիչներ և ռազմածովային ուժերի ռազմանավեր:

«Ընդհանուր նպատակն է ապաէսկալացնել տարածաշրջանը, զսպել և պաշտպանվել այդ հարձակումներից, ինչպես նաև խուսափել տարածաշրջանային հակամարտությունից»,- CBS-ին ասել է Սպիտակ տան ազգային անվտանգության հարցերով խորհրդականի տեղակալ Ջոնաթան Ֆայները:

ԱՄՆ-ն ու Իսրայելը պատրաստվում են իրադարձությունների ցանկացած շրջադարձի, հավելել է Ֆայները։