06.06.2026 | 01:06
«Ուժեղ Հայաստանի» մասնակցությունը կվիճարկվի՞ Վարչական դատարանում, թե՞ ոչ․ «Հանրապետության» անդամը՝ իրենց որոշման մասին
Թուրքիան արգելափակել է ՆԱՏՕ-Իսրայել համագործակցությունը Գազայում պատերազմի պատճառով․ Reuters
Քաղաքականություն
01.08.2024 | 21:02
Թուրքիան հոկտեմբերից արգելափակել է ՆԱՏՕ-ի և Իսրայելի համագործակցությունը Գազայում պատերազմի պատճառով՝ նշելով, որ դաշինքը չպետք է համագործակցի Իսրայելի հետ որպես գործընկեր, քանի դեռ հակամարտությունը չի ավարտվել: Այս մասին Reuters-ին հայտնել են իրավիճակին ծանոթ աղբյուրները։
Իսրայելն ունի ՆԱՏՕ-ի գործընկերոջ կարգավիճակ և սերտ հարաբերություններ է զարգացրել ռազմական դաշինքի ու նրա որոշ անդամների, մասնավորապես, իր ամենամեծ դաշնակից ԱՄՆ-ի հետ: Անանուն մնալու պայմանով աղբյուրներն ասել են, որ Թուրքիան վետո է դրել Իսրայելի հետ ՆԱՏՕ-ի բոլոր գործողությունների վրա հոկտեմբերից, ներառյալ՝ համատեղ հանդիպումներն ու զորավարժությունները՝ Իսրայելի կողմից Գազայում պաղեստինցիների «կոտորածը» դիտարկելով որպես ՆԱՏՕ-ի հիմնադիր սկզբունքների խախտում:
Աղբյուրները նշել են, որ Թուրքիան կպահպանի արգելափակումը և թույլ չի տա Իսրայելին շարունակել կամ զարգացնել փոխգործակցությունը ՆԱՏՕ-ի հետ, քանի դեռ չի ավարտվել հակամարտությունը, քանի որ կարծում է՝ Իսրայելի գործողությունները Գազայում խախտում են միջազգային իրավունքը և մարդու համընդհանուր իրավունքները:
Հուլիսին Վաշինգտոնում ՆԱՏՕ-ի գագաթնաժողովից հետո Թուրքիայի նախագահ Ռեջեփ Թայիփ Էրդողանը հայտարարել է, որ ՆԱՏՕ-ի համար հնարավոր չէ շարունակել գործընկերությունը Իսրայելի վարչակազմի հետ:
Օրերս էլ Իսրայելի արտաքին գործերի նախարար Իսրայել Կացը ՆԱՏՕ-ին հորդորել էր Թուրքիային հեռացնել դաշինքից այն բանից հետո, երբ Էրդողանը սպառնացել էր ներխուժմամբ։
«Ինչպես մտանք Ղարաբաղ ու Լիբիա, նույն բանը կանենք նրանց հետ։ Պատճառ չկա չանելու։ Միայն պետք է ուժեղ լինենք, որ կարողանանք այդ քայլերն անել»,- ասել էր Էրդողանը Ռիզեում իր ղեկավարած «Արդարություն և զարգացում» կուսակցության անդամների հետ հանդիպմանը։
