Իսրայելը վտանգ է ներկայացնում աշխարհի և մարդկության համար․ Էրդողանը՝ Հռոմի պապին

Թուրքիայի նախագահ Ռեջեփ Թայիփ Էրդողանը հեռախոսազրույց է ունեցել Հռոմի Ֆրանցիսկոս պապի հետ։ Թուրքական կողմի հաղորդմամբ՝ Էրդողանն ասել է, թե «Փարիզում Օլիմպիական խաղերի բացման արարողության ժամանակ ցուցադրված անբարոյական տեսարանները վրդովմունք են առաջացնում»։

«Նախագահ Էրդողանը նշել է, որ խոսքի ազատության և հանդուրժողականության քողի տակ ոտնահարվում է մարդկային արժանապատվությունը, ծաղրի են ենթարկվում կրոնական ու բարոյական արժեքները, ասել է, որ դա վիրավորում է մահմեդականներին ոչ պակաս, քան քրիստոնեական աշխարհը, և հայտարարել, որ անհրաժեշտ է ընդհանուր դիրքորոշում ընդունել դրա դեմ»,- ասվում է թուրքական կողմի հաղորդագրությունում։

Էրդողանը նշել է, որ «կրոնական արժեքներին ուղղված մարտահրավերը, այլասերվածության խթանումը և բարոյական կործանումը տագնապալի նշաններ են»։

Թուրքիայի նախագահը նաև ասել է, որ «Իսրայելի ագրեսիան Գազայի հատվածում վերածվել է ցեղասպանության, մատնանշել հումանիտար լուրջ ճգնաժամի առկայությունը և ընդգծել, որ Իսրայելն իր ջարդերն իրականացնում է մի շարք պետությունների կողմից տրամադրված դիվանագիտական, տնտեսական և ռազմական քողի ներքո»։

Նա հայտարարել է՝ «ՀԱՄԱՍ-ի քաղբյուրոյի ղեկավար Իսմայիլ Հանիեի սպանությունը և Լիբանանին հասցված հարվածները ևս մեկ անգամ ցույց են տվել, որ Իսրայելը վտանգ է ներկայացնում ամբողջ տարածաշրջանի, աշխարհի և մարդկության համար, և որ Պաղեստինում ապրող մուսուլմաններն ու քրիստոնյաները պետք է խաղաղություն հաստատեն, քանի դեռ շատ ուշ չէ, և ամբողջ մարդկությունը պետք է անհապաղ համատեղ քայլեր ձեռնարկի այս ուղղությամբ»։

«Նախագահ Էրդողանը վստահություն է հայտնել, որ Հռոմի պապի բանակցությունները երկրների հետ, որոնք աջակցում են Իսրայելին, դրական ազդեցություն կունենան ագրեսիայի դադարեցման ու խաղաղության ապահովման համար՝ առանց աշխարհի ու տարածաշրջանի քաղաքական, անվտանգության ու սոցիալական կառուցվածքին անդառնալի ​​վնաս պատճառելու»,- նշվում է հաղորդագրության մեջ։

Ըստ թուրքական կողմի՝ «Հռոմի Պապը շնորհակալություն է հայտնել Էրդողանին խաղաղության հաստատմանն ուղղված ջանքերի և կրոնական արժեքների նսեմացման հարցում զգայունության համար»։