Քաղաքականություն
01.08.2024 | 22:31
Թուրքիան հանդիսանում է խաղաղության ու կայունության հենակետ տարածաշրջանում՝ միջազգային հարթակում աճող անորոշության ֆոնին։ Այս մասին Թուրքիայի նախագահ Ռեջեփ Թայիփ Էրդողանը գրել է երկրի հիմնադիր Մուստաֆա Քեմալ Աթաթուրքի դամբարանի հուշամատյանում։ Նա համալիր է այցելել երկրի բարձրագույն ռազմական խորհրդի անդամների ուղեկցությամբ, գրում են թուրքական լրատվամիջոցները։
«Այս կրիտիկական ժամանակաշրջանում, երբ աշխարհում աճում է անորոշությունը, տեղի են ունենում թեժ հակամարտություններ, կատարվում են քաղաքական սպանություններ, Թուրքիան առանձնանում է որպես կայունության և խաղաղության հենակետ իր տարածաշրջանում»,- գրել է Էրդողանը։
Նա հավելել է, թե Թուրքիան վճռական է պաշտպանելու իր ազգային շահերը՝ ընդդեմ վերջերս վերածնված ծավալապաշտական նկրտումների։
«Մենք հնարավորություն չենք տա իրականացնելու ծրագրերը նրանց, որոնք ձգտում են տարածաշրջանը վերածել արյան ծովի՝ շարունակելով վստահության աղբյուր լինել մեր ընկերների, ինչպես նաև մեր երկրի քաղաքացիների համար»,- նշվում է Էրդողանի գրառման մեջ։
Նշենք, որ այսօր Թուրքիայում Էրդողանի գլխավորությամբ տեղի է ունենալու երկրի բարձրագույն ռազմական խորհրդի նիստ։
