Ցեղասպան Նեթանյահուի ավարտը կլինի այնպիսին, ինչպիսին Հիտլերինն էր․ Թուրքիայի ԱԳՆ-ի հայտարարությունը

Թուրքիայի ԱԳՆ-ն արձագանքել է երկրի նախագահ Ռեջեփ Թայիփ Էրդողանի վերաբերյալ Իսրայելի արտաքին գործերի նախարարի հայտարարությանը։

«Ինչպես ավարտեց ցեղասպան Հիտլերը, այդպես էլ կավարտի ցեղասպան Նեթանյահուն (Իսրայելի վարչապետ Բենիամին Նեթանյահու)։ Ինչպես պատասխանատվության ենթարկվեցին ցեղասպան նացիստները, այնպես էլ պատասխանատվության կենթարկվեն նրանք, որոնք փորձում են ոչնչացնել պաղեստինցիներին։ Մարդկությունը կկանգնի պաղեստինցիների կողքին։ Դուք չեք ոչնչացնի պաղեստինցիներին»,- ասվում է Թուրքիայի ԱԳՆ-ի X-ի միկրոբլոգի գրառման մեջ։

Թուրքիայի ԱԳ նախարար Հաքան Ֆիդանն էլ հայտարարել է, թե «միջազգային սիոնիստական ​​շրջանակները փորձում են ճնշել մարդկության խղճի ձայնը, որը դարձել է Էրդողանը»։

«Մեր նախագահը դարձել է մարդկության խղճի ձայնը։ Միջազգային սիոնիստական ​​շրջանակները, առաջին հերթին Իսրայելը, որոնք փորձում են խլացնել այդ ձայնը, մեծ խուճապի մեջ են»,- նշել է թուրք նախարարը X-ում։

Նա գրել է, թե «պատմության ընթացքում ցեղասպանության բոլոր մեղավորները և նրանց հանցակիցներն արժանացել են նույն ճակատագրին»։

Նշենք, որ Իսրայելի ԱԳ նախարար Իսրայել Կացը, Էրդողանի սպառնալիքներին պատասխանելով, հայտարարել էր, որ Թուրքիայի նախագահը գնում է Իրաքի նախկին նախագահ Սադամ Հուսեյնի ճանապարհով։

«Էրդողանը գնում է Սադամ Հուսեյնի հետքերով և սպառնում է հարձակվել Իսրայելի վրա։ Պարզապես թող հիշի, թե ինչ կատարվեց այնտեղ և ինչպես ավարտվեց»,- գրել էր Կացը X-ը իր միկրոբլոգում։

Էրդողանն իր հերթին ավելի վաղ խոսել էր Իսրայել հնարավոր ներխուժման մասին։

«Ինչպես մտանք Ղարաբաղ ու Լիբիա, նույն բանը կանենք նրանց հետ։ Պատճառ չկա չանելու։ Միայն պետք է ուժեղ լինենք, որ կարողանանք այդ քայլերն անենք»,- ասել էր Էրդողանը Ռիզեում իր ղեկավարած «Արդարություն և զարգացում» կուսակցության անդամների հետ հանդիպմանը։

Էմմա Չոբանյան