07.10.2026 | 19:34
«Բրա՛վո»․ Նիկոլ Փաշինյանն ընդդիմադիրների հետ ծափահարեց իր մոտալուտ հրաժարականի մասին դիտարկմանը. ՏԵՍԱՆՅՈՒԹ
Իսրայելում հազարավոր ցուցարարներ կոչ են արել Նեթանյահուին չմեկնել ԱՄՆ
Քաղաքականություն
22.07.2024 | 14:35
Իսրայելում բազմաթիվ ցուցարարներ են դուրս եկել տարբեր քաղաքների փողոցներ՝ կոչ անելով վարչապետ Բենիամին Նեթանյահուին չմեկնել Վաշինգտոն նախապես ծրագրված այցով, քանի դեռ նախապես համաձայնագիր չի ստորագրել ՀԱՄԱՍ-ի հետ՝ Գազայից պատանդների վերադարձի համար, գրում է The Times of Israel-ը։ Ամենամեծ ցույցերը կազմակերպվել են Թել Ավիվում, Երուսաղեմում, Հայֆայում և Կեսարիայում։
Ելույթ ունենալով Թել Ավիվում իսրայելական ռազմական շտաբի մոտ՝ Էյնավ Զանգաուկերը, որի 24-ամյա որդին պատանդ է Գազայի հատվածում, ասել է, որ կա մեկ մարդ, որը կանգնած է գերիների ընտանիքների և նրանց սիրելիների միջև, «և դա վարչապետն է, ում համար ավելի կարևոր է աթոռը պահպանելը, քան կյանքերը»։
Իսրայելի վարչապետը հուլիսի 22-ին պետք է ժամանի Միացյալ Նահանգների մայրաքաղաք։ Նույն օրը Նեթանյահուն նախատեսում է հանդիպել ԱՄՆ նախագահ Ջո Բայդենի հետ, ինչպես նաև ելույթ ունենալ Կոնգրեսում։
Ավելի վաղ հաղորդվել էր, որ Իսրայելը Կատար պատվիրակություն է ուղարկելու ՀԱՄԱՍ-ի հետ անուղղակի բանակցությունների նոր փուլ սկսելու՝ պատանդների ազատ արձակման շուրջ։ Պատվիրակությունը Կատարի մայրաքաղաք Դոհա մեկնելու է հուլիսի 25-ին։
ԱՄՆ Կենտրոնական հետախուզական վարչության (ԿՀՎ) ղեկավար Ուիլյամ Բերնսը նույնպես մասնակցելու է Գազայի հատվածում հրադադարի և պատանդների ազատ արձակման շուրջ բանակցություններին։
Կատարն ու ԱՄՆ-ն Եգիպտոսի հետ միասին միջնորդ են հանդես գալիս այս բանակցություններում։
