Էրդողանն ու նրա դաշնակից Բահչելին Թուրքիայի ամենաքիչ հավանության արժանացած քաղաքական գործիչներն են․ հարցում

Թուրքիայի նախագահ Ռեջեփ Թայիփ Էրդողանը և նրա ազգայնական դաշնակից Դևլեթ Բահչելին ներկայում երկրի ամենաքիչ հավանությունն ունեցող քաղաքական գործիչներից են: Այս մասին են վկայում Yöneylem ընկերության կողմից անցկացված հարցման արդյունքները, գրում են թուրքական լրատվամիջոցները։

Բահչելին հավանության ամենացածր մակարդակով զգալիորեն առաջ է մյուսներից՝ 61,5 տոկոս, նրան հաջորդում է նախագահ Ռեջեփ Թայիփ Էրդողանը՝ 46,6 տոկոսով։

Այս արդյունքները երկրում սոցիալական և տնտեսական ճգնաժամի արտացոլումն են, որը նաև համարվում է մարտին կայացած տեղական ընտրություններում Էրդողանի ԱԶԿ-ի պարտության հիմնական պատճառը։

Բահչելին, որը Ազգայնական շարժում կուսակցության (MHP) առաջնորդն է 1997 թվականից, Թուրքիայի քաղաքականության առանցքային դեմքից է՝ չնայած 1999-2002 թվականներին փոխվարչապետի պաշտոնում պաշտոնավարումից բացի՝ որևէ այլ պետական պաշտոն չի զբաղեցրել: Նա Էրդողանի կատաղի հակառակորդն էր մինչև 2015 թվականը, երբ աստիճանաբար սկսեց միավորվել իշխող կուսակցության հետ։ 2017 թվականին Բահչելին առանցքային դեր է խաղացել նախագահական համակարգին անցնելու առաջարկի գործում։ Սրա համար անհրաժեշտ սահմանադրական փոփոխությունները մշակվել են ինչպես ԱԶԿ-ի, այնպես էլ MHP-ի անդամների կողմից: Դրանից հետո MHP-ն նախագահական ընտրություններում մշտապես աջակցել է Էրդողանին։

Ստամբուլի քաղաքապետ Էքրեմ Իմամօղլուն, որը գլխավոր ընդդիմադիր CHP-ի՝Ժողովրդահանրապետական կուսակցության անդամ է, հավանության չարժանացած գործիչների թվում երրորդ տեղում է՝ 41,2 տոկոսով։ Այս բացահայտումը ուշագրավ է՝ հաշվի առնելով, որ Իմամօղլուն վերընտրվել է մարտին և դիտարկվում է որպես նախագահի ապագա թեկնածու։

Հարցումը, որին մասնակցել է 2400 քաղաքացի հունիսի 26-ից 30-ն ընկած ժամանակահատվածում, ցույց է տալիս, որ Անկարայի քաղաքապետ Մանսուր Յավաշը, որը նույնպես CHP-ի անդամ է, ունի հավանության ամենաբարձր վարկանիշը՝ 52,2 տոկոս, իսկ Իմամօղլուն երկրորդն է՝ 46 տոկոսով ցուցանիշով։ CHP-ի առաջնորդ Օզգուր Օզելը երրորդն է։

Հարցումը ցույց է տվել, որ որոշ քաղաքական գործիչներ ճանաչելի չեն, հարցվածների 20,6 տոկոսը ծանոթ չէ ներքին գործերի նախարար Ալի Երլիքայային, իսկ 14,6 տոկոսը չի ճանաչել արտգործնախարար Հաքան Ֆիդանին:

Էմմա Չոբանյան