07.10.2026 | 23:48
Արթուր Դանիելյանը կալանավորվեց
Ալիևը զանգահարել է Իրանի նորընտիր նախագահին
Քաղաքականություն
10.07.2024 | 11:04
Ադրբեջանի նախագահ Իլհամ Ալիևը զանգահարել է Իրանի Իսլամական Հանրապետության նորընտիր նախագահ Մասուդ Փեզեշքիանին։ Ադրբեջանական կողմի փոխանցմամբ՝ Ալիևը շնորհավորել է Փեզեշքիանին Իրանի նախագահի պաշտոնում ընտրվելու կապակցությամբ և հաջողություններ մաղթել գործունեության մեջ։
Իրանի նախագահը շնորհակալություն է հայտնել Ալիևին ուշադրության և շնորհավորանքի համար։ Նա ասել է, որ բոլոր ջանքերը կներդնի` ապագայում երկու երկրների հարաբերությունները բոլոր ոլորտներում զարգացնելու համար։
Զրույցի ընթացքում կողմերը վստահություն են հայտնել ընդհանուր կրոնական և մշակութային արմատների, բարեկամության ու եղբայրության վրա հիմնված հարաբերությունների հետագա ընդլայնման, տարբեր ոլորտներ ընդգրկող համագործակցության զարգացման հարցում։ Պետությունների ղեկավարներն ընդգծել են երկու երկրների միջև մինչ այժմ ձեռք բերված պայմանավորվածությունների իրականացման կարևորությունը։
Հեռախոսազրույցի ընթացքում Ադրբեջանի և Իրանի նախագահները քննարկել են երկկողմ հետաքրքրություն ներկայացնող հարցեր։
Նշվում է, որ Ալիևը Փեզեշքիանին հրավիրել է այցելել Ադրբեջան։ Գոհունակությամբ ընդունելով հրավերը՝ Իրանի նախագահն իր հերթին Ադրբեջանի նախագահին հրավիրել պաշտոնական այց կատարել Իրան, որն Ալիևն ընդունել է։
