Մի խումբ դեմոկրատ կոնգրեսականներ կողմ են արտահայտվել ընտրություններում Բայդենին փոխարինելուն

ԱՄՆ գործող նախագահ Ջո Բայդենը պետք է հանի իր թեկնածությունը նոյեմբերին նախանշված նախագահական ընտրություններից։ Նման կարծիք են հայտնել մի խումբ դեմոկրատներ հեռախոսային խորհրդակցության ժամանակ, որն անցկացրել է Կոնգրեսի Ներկայացուցիչների պալատի դեմոկրատական ​​փոքրամասնության առաջնորդ Հաքիմ Ջեֆրիսը։ Այս մասին հայտնում է CNN-ը՝ վկայակոչելով իր աղբյուրներին, փոխանցում է DW-ի ռուսական ծառայությունը։

Նշվում է, որ Ջեֆրիսը որոշել է այդ խորհրդակցությունն անցկացնել՝ մինչև ամառային արձակուրդից հետո Ներկայացուցիչների պալատի աշխատանքի վերսկսումը, որպեսզի պարզի իր կուսակիցների տրամադրվածությունը Բայդենի թեկնածության հետ կապված հունիսին անցկացված վատ հեռուստաբանավեճից հետո։

Լրատվամիջոցին աղբյուրը հայտնել է, որ ինքը՝ Ջեֆրիսը, կուսակցական գործընկերների հետ զրույցում այս հարցի վերաբերյալ իր կարծիքը չի հայտնել։ Սակայն դեմոկրատների թիվը, որոնք հստակ հայտարարել են, որ ավելի լավ է՝ Բայդենը դուրս գա նախագահական մրցապայքարից, գերազանցել է նրանց, որոնք դեռևս պաշտպանում են նրա թեկնածությունը։

Երեք աղբյուրներ նշել են ազդեցիկ կոնգրեսականների անունները, որոնք, ըստ նրանց, դեմ են Բայդենի մասնակցությանը ընտրություններին։ Նրանք են՝ Մարկ Տականոն, Ադամ Սմիթը, Ջիմ Հայմեսը, Ջո Մորելը, Ջերի Նադլերը և Սյուզան Ուայլդը։ Միաժամանակ, Մաքսին Ուոթերսը և Բոբի Սքոթը հանդես են եկել ի պաշտպանություն Բայդենի։

Որոշ կոնգրեսականներ, մասնավորապես, Լլոյդ Դոգեթը, Սեթ Մուլթոնը, Ռաուլ Գրիհալվան, Էնջի Քրեյգը և Մայք Քուիգլին, ավելի վաղ հրապարակավ կոչ էին արել Բայդենին դուրս գալ նախագահական մրցապայքարից։

CNN-ի հրապարակումը ենթադրում է, որ հուլիսի 7-ին տեղի ունեցած դեմոկրատների հանդիպման ժամանակ, ընդհանուր առմամբ, ընդունվել է, որ նախագահական ընտրություններում կուսակցության թեկնածուն պետք է լինի ԱՄՆ փոխնախագահ Քամալա Հարիսը։