Ադրբեջանի վերաբերյալ ԵԽ Խոշտանգումների կանխարգելման կոմիտեի հայտարարությունը Բաքուն «անհիմն և անարդար» է անվանել

Պաշտոնական Բաքուն խորը ափսոսանք է հայտնել Ադրբեջանի վերաբերյալ Եվրոպայի խորհրդի Խոշտանգումների կանխարգելման կոմիտեի (CPT) հրապարակային հայտարարության կապակցությամբ։

«Կոմիտեն, հակառակ Խոշտանգումների և անմարդկային կամ արժանապատվությունը նվաստացնող վերաբերմունքի կամ պատժի կանխարգելման մասին եվրոպական կոնվենցիայի պահանջին, աննախադեպ որոշում է կայացրել ամբողջությամբ հրապարակել 2022 թվականին իրականացված հատուկ այցի արդյունքների մասին զեկույցը՝ առանց Ադրբեջանից համապատասխան համաձայնություն ստանալու։ Նման մոտեցումն անարդար ու անհիմն է, ինչպես նաև իրավական տեսակետից կասկածելի»,- ասվում է Ադրբեջանի ԱԳՆ խոսնակ Այխան Հաջիզադեի հայտարարությունում։

Նա նշել է, որ 2002 թվականից ի վեր կոմիտեն մի քանի անգամ պարբերաբար և հատուկ այցելություններ է կատարել Ադրբեջան և հրապարակել զեկույցներ Բաքվի կողմից Կոնվենցիայի կատարման վերաբերյալ։ Ադրբեջանը ներկայացրել է կառավարության դիրքորոշումը զեկույցներում նշված յուրաքանչյուր դրույթի վերաբերյալ։ Բացի այդ, ըստ Ադրբեջանի ԱԳՆ-ի՝ համապատասխան քայլեր են ձեռնարկվել թերությունները վերացնելու ուղղությամբ, և Կոմիտեի առաջարկությունները միշտ հաշվի են առնվել: Նշվում է, թե համագործակցության ընթացքում մինչ օրս կոմիտեին անհրաժեշտ աջակցություն է ցուցաբերվել իր այցելությունների ընթացքում։

«Ափսոսանք է առաջացնում այն, որ այս որոշումն ընդունվել է Ադրբեջանի և Եվրոպայի խորհրդի միջև հարաբերություններում առկա իրավիճակի ֆոնին, որն առաջացել է Եվրախորհրդի Խորհրդարանական վեհաժողովի (ԵԽԽՎ) կողմից Ադրբեջանի պատվիրակության լիազորությունները չվավերացնելու՝ 2024 թվականի հունվարի կանխակալ որոշումից հետո։ Մենք մերժում ենք հրապարակային հայտարարության մեջ պարունակվող քննադատությունը, որտեղ մի շարք պետական ​​կառույցների հետ կառուցողական համագործակցության փոխարեն՝ պատասխանատվությունը դրվում է նրանց վրա։ Ադրբեջանը, ազատազրկման դատապարտված անձանց պաշտպանության հետ մեկտեղ, զգալի առաջընթաց է գրանցել համապատասխան պրակտիկան ընդհանուր ընդունված չափանիշներին համապատասխանեցնելու գործում»,- նշել է Հաջիզադեն։

Հիշեցնենք, որ Եվրոպայի խորհրդի Խոշտանգումների և անմարդկային կամ արժանապատվությունը նվաստացնող վերաբերմունքի կամ պատժի կանխարգելման կոմիտեն հայտարարություն էր տարածել Ադրբեջանի վերաբերյալ՝ նշելով, որ այդ երկրի իշխանությունները հրաժարվում են կառույցի հետ համագործակցությունից։