02.06.2026 | 18:55
Արթուր Օսիպյանի մի քանի իրավունք է խախտվել․ Իզաբելլա Սարգսյան
Թուրքիայի ԱԳՆ-ն անընդունելի է անվանել թուրք ֆուտբոլիստի նկատմամբ ՈւԵՖԱ-ի հետաքննությունը
Քաղաքականություն
04.07.2024 | 15:40
Թուրքիայի ԱԳՆ-ն հայտարարություն է տարածել նեոֆաշիտական «Գորշ գայլերի» նշանը ցույց տալու համար երկրի ազգային հավաքականի ֆուտբոլիստ Մերիհ Դեմիրալի նկատմամբ ՈՒԵՖԱ-ի կողմից սկսված հետաքննության կապակցությամբ։ Պաշտոնական Անկարան անընդունելի է որակել որոշումը՝ սատարելով թուրք ֆուտբոլիստի ռասիստական պահվածքը։
«Անընդունելի է, որ ՈւԵՖԱ-ն կարգապահական հետաքննություն է սկսել Թուրքիայի ազգային հավաքականի ֆուտբոլիստ Մերիհ Դեմիրալի նկատմամբ՝ ԵՎՐՈ-2024-ի 1/8 եզրափակչի՝ Թուրքիայի և Ավստրիայի ֆուտբոլի ազգային հավաքականների խաղից հետո։ Ավելին, Գերմանիայի Սահմանադրության պաշտպանության դաշնային գրասենյակի կողմից 2023 թվականի սեպտեմբերին հրապարակված զեկույցում ընդգծվում էր, որ «Գորշ գայլ» նշանը պարտադիր չէ, որ կապված լինի աջ ծայրահեղականության հետ։ «Գորշ գայլ» նշանը Գերմանիայում ևս արգելված խորհրդանիշ չէ։ Այս պայմաններում Գերմանիայի իշխանությունների կողմից Դեմիրալի նկատմամբ արձագանքները կարող են այլատյացություն համարվել։ Մենք դատապարտում ենք պատմական ու մշակութային խորհրդանիշի օգտագործմանը քաղաքականապես մոտիվացված արձագանքները, որն ուղղված չի եղել որևէ մեկի դեմ»,- ասվում է հայտարարության մեջ։
Հիշեցնենք, որ Թուրքիայի ԱԳՆ-ն նաև Անկարայում Բեռլինի դեսպանին էր կանչել՝ ֆուտբոլիստի հետ կապված սկանդալի վերաբերյալ Գերմանիայի ներքին գործերի նախարարի հայտարարությունների համար։
«Թուրք աջ ծայրահեղականների խորհրդանիշները տեղ չունեն մեր մարզադաշտերում: Ֆուտբոլի Եվրոպայի առաջնությունը որպես ռասիզմի հարթակ օգտագործելը միանգամայն անընդունելի է։ Մենք ակնկալում ենք, որ ՈւԵՖԱ-ն կհետաքննի գործը և կքննարկի պատժամիջոցները»,- նշել էր Գերմանիայի ներքին գործերի նախարար Նենսի Ֆեյզերը։
Ավելի վաղ էլ ՈՒԵՖԱ-ն հայտնել էր, որ հետաքննություն է սկսել Թուրքիայի հավաքականի պաշտպան Մերիհ Դեմիրալի կողմից ծայրահեղ ազգայնական «Գորշ գայլեր» կազմակերպության նշանը ցույց տալու հետ կապված։
Էմմա Չոբանյան
