11.08.2026 | 12:20
Մեսին բաց կթողնի «Ինտեր Մայամիի» առաջիկա խաղերը
Պուտինն Աստանայում երկկողմ հանդիպումներ կանցկացնի Էրդողանի, Ալիևի և այլ երկրների ղեկավարների հետ
Քաղաքականություն
02.07.2024 | 21:20
Ռուսաստանի նախագահ Վլադիմիր Պուտինը Շանհայի համագործակցության կազմակերպության գագաթնաժողովի շրջանակում մի շարք երկկողմ հանդիպումներ կունենա այլ երկրների ղեկավարների հետ։ Այս մասին ճեպազրույցում ասել է Պուտինի օգնական Յուրի Ուշակովը՝ հավելելով, որ չեն բացառվում միջոցառման շրջանակում այլ շփումներ, գրում է ՏԱՍՍ-ը։
Նա նշել է, որ Մոսկվան Աստանայի գագաթնաժողովն ընկալում է որպես «երկկողմ շփումներ կազմակերպելու հնարավորություն այն երկրների ղեկավարների հետ, որոնք ներկա կլինեն այնտեղ», ուստի ՌԴ նախագահի ծրագիրը «ներառում է մի շարք շատ կարևոր երկկողմ շփումներ»։
Հուլիսի 3-ի միջոցառումների մեկնարկից մեկ օր առաջ բանակցություններ են ծրագրվում Ադրբեջանի նախագահ Իլհամ Ալիևի, Մոնղոլիայի նախագահ Ուխնաագին Խուրելսուխի, Թուրքիայի նախագահ Ռեջեփ Թայիփ Էրդողանի, Չինաստանի նախագահ Սի Ցզինպինի և Պակիստանի վարչապետ Շահբազ Շարիֆի հետ։
Երեկոյան նախատեսված ոչ պաշտոնական ընթրիքից առաջ գագաթնաժողովի մասնակիցները կհանդիպեն նաև Ղազախստանի նախագահ Կասիմ-Ժոմարտ Տոկաևի հետ։
Ուշակովն ասել է, որ հուլիսի 4-ին, գուցե, «ժամանակ լինի կարճ երկկողմ շփումներ կազմակերպելու համար», այդ թվում՝ բանակցություններ Իրանի նախագահի պաշտոնակատար Մոհամմադ Մոխբերի հետ, որն արդեն համաձայնեցված է։
Շանհայի համագործակցության կազմակերպության գագաթնաժողովին մասնակցելու են նաև Կատարի, ԱՄԷ-ի, Թուրքմենստանի, ինչպես նաև միջազգային կազմակերպությունների ներկայացուցիչները՝ ՄԱԿ-ի գլխավոր քարտուղար Անտոնիո Գուտերեշը, ԱՊՀ գլխավոր քարտուղար Սերգեյ Լեբեդևը և ՀԱՊԿ գլխավոր քարտուղար Իմանգալի Տասմագամբետովը, ինչպես նաև ՏՀԶԿ ու Պարենի և անվտանգության իսլամական կազմակերպության ղեկավարները։
