Ուկրաինան ու ԵՄ-ն անվտանգության մասին համաձայնագիր են ստորագրել

Ուկրաինայի նախագահ Վլադիմիր Զելենսկին Բրյուսելում անվտանգության մասին համաձայնագիր է ստորագրել Եվրամիության հետ։ Այս միջոցառումը բացել է Եվրոպական խորհրդի նիստը, որը համախմբել է ԵՄ երկրների ղեկավարներին, գրում է DW-ի ռուսական ծառայությունը։

Համաձայնագրի ստորագրումից հետո օրակարգի հաջորդ կետը Զելենսկիի ելույթն է Եվրախորհրդում և Ուկրաինայի իրավիճակի քննարկումը, ինչպես նաև նրա աջակցությունը Եվրոպական միությունից։

«Եվրամիության պարտավորությունները ներառում են կանխատեսելի, երկարաժամկետ ու կայուն անվտանգության և պաշտպանության աջակցություն Ուկրաինային, մասնավորապես, Համատեղ անվտանգության և պաշտպանության քաղաքականության առաքելությունների միջոցով, ինչպես նաև անվտանգության ավելի լայն պարտավորություններ»,- ասվում է համաձայնագրի տեքստում։

Խոսքը Ուկրաինային ռազմական տեխնիկայով կայուն և երկարաժամկետ ապահովելու, ռազմական պատրաստության, պաշտպանական բարեփոխումների աջակցության, եվրոպական և ուկրաինական պաշտպանական արդյունաբերության համագործակցության մասին է։ Մյուս կետերն են՝ կիբեր և հիբրիդային սպառնալիքներին դիմակայունության ավելացումը, ականազերծման գործողությունը, քաղաքացիական անվտանգության ոլորտի բարեփոխումները և իրավապահ մարմիններին աջակցությունը, հրազենի տարածման դեմ պայքարը, էներգետիկ և միջուկային անվտանգության աջակցությունը, հետախուզական և արբանյակային պատկերների փոխանակումը։

Համաձայնագիրը երաշխավորում է ոչ միայն աջակցություն Ուկրաինայի պաշտպանությանը, այլև մակրոֆինանսական, հումանիտար օգնություն, աջակցություն վերակառուցմանն ու բարեփոխումներին։

«ԵՄ-ն վճռական է՝ շարունակել Ուկրաինային և նրա ժողովրդին տրամադրել բոլոր անհրաժեշտ քաղաքական, ֆինանսական, տնտեսական, հումանիտար, ռազմական և դիվանագիտական ​​աջակցությունը այնքան ժամանակ, որքան անհրաժեշտ է և այնքան ինտենսիվ, որքան անհրաժեշտ է»,- ասվում է համաձայնագրի տեքստում։

Եվրամիության առաջնորդների՝ Շառլ Միշելի և Ուրսուլա ֆոն դեր Լեյենի հետ համաձայնագիրը կնքելուց անմիջապես հետո Վլադիմիր Զելենսկին անվտանգության երկկողմանի համաձայնագրեր է ստորագրել Լիտվայի և Էստոնիայի հետ։