Հայաստանը հետաքրքրված է իսրայելա-հնդկական նորագույն MR-SAM ՀՕՊ համակարգով

Հայաստանը հատուկ հետաքրքրություն է ցուցաբերում «Barak 8» զենիթահրթիռային համալիրի նկատմամբ, որը Հնդկաստանի և Իսրայելի համատեղ նախագիծն է և հայտնի է նաև որպես LR-SAM կամ MR-SAM համակարգ։ «Արմենպրես»-ի հաղորդմամբ՝ այս մասին հայտնում է «Bulgarian military»-ին:

«Քանի որ Հայաստանն աստիճանաբար հեռանում է բացառապես ռուսական զենքի մատակարարներից կախվածությունից՝ Երևանն ավելի բարենպաստ ներքին և միջազգային քաղաքականություն է վարում: Ըստ հաղորդագրությունների՝ Հայաստանը հատուկ հետաքրքրություն է ցուցաբերում «Barak 8» զենիթահրթիռային համալիրի նկատմամբ, որը Հնդկաստանի և Իսրայելի համատեղ նախագիծն է և հայտնի է նաև որպես LR-SAM կամ MR-SAM համակարգ»,-նշված է հոդվածում։

Իսրայելա-հնդկական «երկիր-օդ» «Barak 8» հրթիռը Հնդկական պաշտպանական հետազոտությունների և զարգացման կազմակերպության (DRDO) և Իսրայելի օդատիեզերական արդյունաբերության (IAI) համատեղ մշակումն է: Այն նախատեսված է տարբեր օդային սպառնալիքներից հուսալի հակաօդային պաշտպանություն ապահովելու համար։ Հրթիռը ավելի մեծ համակարգի մի մասն է, որն իր մեջ ներառում է բազմաֆունկցիոնալ հսկողության և սպառնալիքների նախազգուշացման ռադար, հրամանատարության և կառավարման համակարգ և շարժական արձակիչներ:

Ինչ վերաբերում է չափսերին, ապա «Barak 8» հրթիռն ունի մոտավորապես 4,5 մետր երկարություն և մոտ 0,225 մետր տրամագիծ։ Այն կշռում է մոտ 275 կիլոգրամ, ինչը նրան դարձնում է համեմատաբար թեթև հրթիռ, որը կարող է օգտագործվել տարբեր հարթակներում, այդ թվում ռազմածովային նավերում և այլն։

«Պարզվում է, որ Հայաստանը փնտրում է «երկիր-օդ» դասի հրթիռային համալիրների ավելի ժամանակակից և արդյունավետ անալոգներ, որոնք ներկայումս օգտագործվում են հայկական բանակի կողմից: Ներկայումս Հայաստանը շահագործում է S-300 զենիթահրթիռային համալիրը, որն իր հնարավորություններով համարվում է «Barak 8»-ի հիմնական համարժեքներից մեկը»,- նշված է հոդվածում։

Ըստ Bulgarian military»-իի աղբյուրների Հայաստանը ձեռք է բերել 9K33 «Օսա» զենիթահրթիռային համալիրը։

«Չնայած այն ավելի հին է, քան Tor-M2KM-ը, 9k33 «Օսա»-ն դեռ արդյունավետ է ինքնաթիռներից և ուղղաթիռներից կարճ հեռահարության հակաօդային պաշտպանություն ապահովելու գործում: Այն ինքնագնաց համակարգ է, որը մեծացնում է դրա գործառնական ճկունությունը և արագ տեղակայման հնարավորությունները»,- ասված է հոդվածում։

Հոդվածում նշվում է նաև, որ Հայաստանը հետաքրքրություն է ցուցաբերել հնդկական «Akash» հրթիռային համակարգի կատարելագործված տարբերակի ՝ Akash-NG-ի նկատմամբ։

«Հնդկաստանի կառավարությունը դեռ չի հաստատել Akash-NG-ի արտադրությունը: Սա նշանակում է, որ եթե Հայաստանը ցանկանա ձեռք բերել Akash-NG-ն, դա կարող է տևել առնվազն երեք տարի: Հաշվի առնելով այս գործոնները ՝ Հայաստանը կշռադատում է MR-SAM-ի և Akash-NG-ի միջև եղած տարբերակները ։ Աղբյուրները IDRW.org հաղորդում են, որ ներկայումս նախապատվությունը տրվում է MR-SAM-ին՝ իր անմիջական մատչելիության և հաստատված արտադրական կարողությունների պատճառով»,- նշված է հոդվածում։