Պաղեստինյան նախագահությունը բարձր է գնահատում Հայաստանի կողմից Պաղեստինի ճանաչումը

Պաղեստինի նախագահությունը բարձր է գնահատել Պաղեստին պետությունը որպես անկախ և ինքնիշխան ճանաչելու մասին Հայաստանի Հանրապետության որոշումը, գրում է Wafa լրատվական գործակալությունը։

Մամուլի հաղորդագրության մեջ նախագահությունը խորը երախտագիտություն է հայտնել «այս խիզախ և նշանակալի որոշման համար»՝ այն դիտարկելով որպես «առանցքային քայլ երկկողմ հարաբերությունների և տարածաշրջանում խաղաղության ու կայունության ամրապնդման ուղղությամբ»։

Նախագահությունը շնորհակալություն է հայտնել Հայաստանին «համարձակ և իմաստուն քայլի համար, որն ընդգծում է երկու ժողովուրդների միջև ամուր բարեկամական կապերը»: Այն նաև բարձր է գնահատել Հայաստանի կառավարության և ժողովրդի հանձնառությունը՝ աջակցելու Պաղեստինի ժողովրդին և նրա օրինական իրավունքներին իր հողի և ինքնորոշման նկատմամբ:

«Հայաստանի իմաստուն որոշումը համահունչ է երկու պետությունների լուծման սկզբունքներին, ռազմավարական ընտրություն, որը պաշտպանում է միջազգային կամքն ու օրինականությունը: Այս ճանաչումը դրականորեն նպաստում է երկու պետությունների լուծմանը, որը բախվում է համակարգված մարտահրավերների, և նպաստում է անվտանգությանը, խաղաղությանը և կայունությանը բոլոր ներգրավված կողմերի համար»,- ասվում է հայտարարության մեջ։

Նշվում է, որ Պաղեստինի ղեկավարությունը հորդորում է մյուս երկրներին, հատկապես, եվրոպական պետություններին, որոնք դեռ պետք է ճանաչեն Պաղեստին պետությունը, հետևել այս օրինակին՝ հիմնվելով 1967 թվականի սահմանների վրա հիմնված միջազգային օրինական բանաձևերի վրա, որոնք ներառում են Գազան, Արևմտյան ափը և Արևելյան Երուսաղեմը:

Նախագահությունը նաև կոչ է արնում երկրներին ընդօրինակել Իսպանիայի, Իռլանդիայի, Նորվեգիայի, Սլովենիայի և Հայաստանի կողմից վերջին ճանաչումներին, որոնք ընտրել են աջակցելու խաղաղության, կայունության և միջազգային իրավունքի ամրապնդման ճանապարհը։ Պաղեստինի ղեկավարությունն իր երախտագիտությունն է հայտնում բոլոր բարեկամ երկրներին և ժողովուրդներին, որոնք իրենց ներդրումն են ունեցել այդ ամենին հասնելու գործում:

Հիշեցնենք, որ ՀՀ ԱԳՆ-ն այսօր ավելի վաղ հայտարարություն էր տարածել Պաղեստինի պետության ճանաչման վերաբերյալ։ Այս հայտարարությունից հետո Իսրայելում ՀՀ դեսպանը կանչվել է այդ երկրի ԱԳՆ։