23.11.2024 | 00:35
Թրամփի հետ հեռախոսազրույցը տեղեկատվական էր, բայց նաև շատ պոզիտիվ. Փաշինյան. ՏԵՍԱՆՅՈՒԹ
Ալիևի օգնականը հայտարարել է, թե հայ-ֆրանսիական ռազմական համագործակցության ընդլայնումը «լուրջ մտահոգության տեղիք է տալիս»
Քաղաքականություն
19.06.2024 | 12:19
Պաշտոնական Բաքուն, որը ժամանակակաից սպառազինությունների ձեռքբերման պայմանագրեր է կնքում Իսրայելի, Թուրքիայի, Սերբիայի և մի շարք այլ երկրների հետ, հերթական դժգոհությունն է հայտնել Հայաստանի և Ֆրանսիայի ռազմատեխնիկական համագործակցության վերաբերյալ։ Այս անգամ հակաֆրանսիական հայտարարություններով է հանդես եկել Ադրբեջանի նախագահի օգնական Հիքմեթ Հաջիևը։
Լրագրողների հետ զրույցում նա ասել է, թե Բաքուն «արդյունավետ չի համարում Ֆրանսիայի քաղաքականությունը Հարավային Կովկասի նկատմամբ» և դա անվանել է «վնասակար»։ Ըստ Հաջիևի՝ սա չի նպաստում Հարավային Կովկասում խաղաղության օրակարգի առաջխաղացմանը։
«Հայաստանի և Ադրբեջանի միջև հարաբերությունների կարգավորման գործընթացի, հատկապես՝ ապրիլի 19-ին սահմանների սահմանազատման, երկու երկրների բարձրագույն իշխանությունների մակարդակով դեկտեմբերի 7-ի համատեղ հայտարարության և այդ ուղղությամբ ձեռնարկված լուրջ քայլերի համատեքստում։ Ֆրանսիայի ռազմականացման քաղաքականությունը լուրջ սպառնալիք է տարածաշրջանի համար այն իրավիճակում, երբ լուրջ քայլեր են ձեռնարկվել ամբողջ Հարավային Կովկասի խաղաղ վերափոխման ուղղությամբ։ Սա լուրջ հարված է կարգավորման գործընթացին։ Ֆրանսիական ռազմականացման քաղաքականությունը քայլ է, որը կխթանի Հայաստանում ռևանշիստական ուժերին։ Ուստի Ֆրանսիայի ռազմականացման քաղաքականությունը, հատկապես, Հայաստանին հարձակողական մահաբեր զենքի տրամադրումը և հայ-ֆրանսիական ռազմական համագործակցության ընդլայնումը լուրջ մտահոգության տեղիք են տալիս»,- հայտարարել է Հաջիևը։
Նա ասել է, թե «որպես ՄԱԿ-ի Անվտանգության խորհրդի անդամ՝ Ֆրանսիան պետք է պատասխանատու քաղաքականություն վարի», նաև հավելել, թե Հայաստանն «օկուպացիա և ագրեսիա իրականացրած երկիր է, որին զինելն անընդունելի է»։
Հիշեցնենք, որ նախօրեին էլ Հայաստանի և Ֆրանսիայի միջև ռազմատեխնիկական համագործակցության զարգացման ու նոր պայմանագրերի կնքման կապակցությամբ դժգոհություն էր հայտնել Ադրբեջանի ՊՆ-ն՝ հանդես գալով քաղաքական հայտարարությամբ։ Այն մտահոգություն էր հայտնել, որ Հայաստանը CAESAR համակարգերի գնման պայմանագիր է կնքել Ֆրանսիայի հետ։
Էմմա Չոբանյան
