21.11.2024 | 23:30
Թուրքիայում ընդդիմադիր քաղաքապետներին դատապարտել են ազատազրկման «ահաբեկչության» մեղադրանքով
Ադրբեջանի ՊՆ-ն իր բողոքն է հայտնել Հայաստանին ֆրանսիական CAESAR-ների վաճառքի կապակցությամբ
Քաղաքականություն
18.06.2024 | 20:48
Հայաստանի և Ֆրանսիայի միջև ռազմատեխնիկական համագործակցության զարգացման ու նոր պայմանագրերի կապակցությամբ Ադրբեջանի Պաշտպանության նախարարությունը դժգոհություն է հայտնել՝ հանդես գալով քաղաքական հայտարարությամբ։ Ադրբեջանի ՊՆ-ն մտահոգված է, որ Հայաստանը CAESAR համակարգերի գնման պայմանագիր է կնքել Ֆրանսիայի հետ։
Հայտարարության համաձայն՝ այն փաստը, որ «Ֆրանսիան Հայաստանին մահաբեր և հարձակողական հրետանային սարքեր և այլ զինատեսակներ է մատակարարում՝ չնայած ադրբեջանական կողմի նախազգուշացմանը, Հարավային Կովկասում Ֆրանսիայի սադրիչ գործունեության ևս մեկ ապացույց է տարածաշրջանում»։
«Թեև Ֆրանսիայի ՊՆ-ն անցյալ տարվա հոկտեմբերին իր հայտարարության մեջ պնդում էր, որ Հայաստանին մատակարարվող զինտեխնիկան պաշտպանական բնույթ է կրում, ներկայիս ռազմական գործարքով Հայաստանին մահաբեր զենք մատակարարելը Ֆրանսիայի ղեկավարության կեղծավորության ևս մեկ դրսևորում է։ Հարավկովկասյան տարածաշրջանում ռազմականացման և աշխարհաքաղաքական ինտրիգների քաղաքականություն վարող Մակրոնի ռեժիմը խոչընդոտ է Հայաստանի և Ադրբեջանի միջև հարաբերությունների կարգավորման և տարածաշրջանում կայուն խաղաղության ապահովման համար։ Իր ապակառուցողական և կողմնակալ քաղաքականության պատճառով տարածաշրջանային գործընթացներից դուրս մնացած Ֆրանսիայի ներկայիս ղեկավարությունը չի կարող դա ներել Ադրբեջանին, հետևաբար, շարունակում է իր ապակառուցողական քաղաքականությունը»,- ասվում է հայտարարության մեջ։
«ՄԱԿ-ի Անվտանգության խորհրդի մշտական անդամ Ֆրանսիայի կողմից արյունալի ռազմական ագրեսիա իրականացնելու փորձ ունեցող Հայաստանի վերազինումը և Հայաստանի ղեկավարության ռևանշիստական քաղաքականությանը սատարելը և՛ քաղաքական անպատասխանատվություն են, և՛ ճանապարհ դեպի նոր պատերազմ»,- ասվում է հայտարարության մեջ։
Ադրբեջանի ՊՆ-ն նաև Ֆրանսիային մեղադրում է «գաղութատիրական անցյալի ու քաղաքականության», ինչպես նաև «Բաքվի դեմ կեղտոտ քարոզչական և ապատեղեկատվական արշավ իրականացնելու մեջ»։
«Հայտարարում ենք, որ Հարավային Կովկասի տարածաշրջանում իրավիճակի սրման և պատերազմի նոր օջախ ստեղծելու պատասխանատվությունն ամբողջությամբ կրելու է ռևանշիստական քաղաքականություն վարող Հայաստանի ղեկավարությունը և Մակրոնի բռնապետությունը»,- հայտարարել է Ադրբեջանի ՊՆ-ն։
Հիշեցնենք, որ Ֆրանսիայի զինված ուժերի նախարար Սեբաստիան Լըկորնյուն, անդրադառնալով ՀՀ ՊՆ ղեկավար Սուրեն Պապիկյանի հետ նախօրեի հանդիպմանը, հայտնել էր CAESAR-ի ձեռքբերման պայմանագրի կնքման մասին։
«Մենք շարունակում ենք ամրապնդել մեր պաշտպանական հարաբերությունները Հայաստանի հետ։ Ջերմ և արդյունավետ հանդիպում իմ պաշտոնակից Սուրեն Պապիկյանի հետ՝ Eurosatory-ի շրջանակում։ Նոր կարևոր մեկնարկ՝ CAESAR հրետանային համակարգերի ձեռքբերման պայմանագրի կնքմամբ»,- գրել էր Լըկորնյուն X-ում։
Էմմա Չոբանյան
