ՀԱՊԿ-ից դուրս գալու օրը հեռու չէ․ վատացել է ՌԴ-ի և Բելառուսի հետ ՀՀ-ի հարաբերությունը․ Գարեգին Միսկարյան․ ՏԵՍԱՆՅՈՒԹ

Սրվել են հայ-բելառուսական հարաբերությունները այն աստիճանի, որ Երևանը և Մինսկը խորհրդակցությունների համար հետ կանչեցին դեսպաններին։ Փաշինյանը ասել է, որ Բելառուս չի գնա, քանի դեռ նախագահը Ալեքսանդր Լուկաշենկոն է։ Մոտ մեկ ամիս առաջ Բաքվում Լուկաշենկոն ասել էր, թե տեղյակ է եղել Ղարաբաղի վրա հարձակվելու Ալիևի ծրագրերից և անգամ համաձայն է եղել, որ այդ խնդիրը հնարավոր է պատերազմով լուծել: Փաշինյանը ԱԺ-ում ասել է՝ հաջորդ տրամաբանական քայլը լինելու է ՀԱՊԿ-ից դուրս գալը, բայց երբ՝ չէր հստակեցրել։ Հայաստանի անդամակցությունը ՀԱՊԿ-ին դե ֆակտո սառեցված է։ Դեինտեգրացիայի պրոցեսի մե՞ջ է ՀՀ-ն, թե՞ կարող է վերականգնվել մասնակցությունը։ «Ժողովրդավարական հարթակ» հիմնադրամի տնօրեն Գարեգին Միսկարյանը Factor TV-ի հետ զրույցում ասում է, որ ՀԱՊԿ-ից դուրս գալու օրը հեռու չէ, հաշվի առնելով, որ վատացել են ՌԴ-ի և Բելառուսի հետ ՀՀ-ի հարաբերությունները․

«ՌԴ-ն և Բելառուսը միլիարդների զենք են վաճառել Ադրբեջանին ՀՀ-ի դեմ պատերազմից առաջ։ Սա ևս մեկ պատճառ է, թե ինչու պետք է Հայաստանը լքի ՀԱՊԿ-ը։ ՀՀ-ի վերջը կլինի ՌԴ-ի ճամբարին միանալը, քանի որ Կրեմլը կորոշի հայերիս փոխարեն, ինչը մեր պատմության վերջը կլինի»,- ասում է Միսկարյանը։

Մինչ ռուս բարձրաստիճան պաշտոնյաները դժգոհում են, որ ՀՀ-ն նվազեցրել է շփումները ՌԴ-ի հետ, վերջին տասը օրում արևմտյան արդեն երկրորդ բարձրաստիճան պաշտոնյան է ժամանել ՀՀ՝ ԱՄՆ պետքարտուղարի առաջին տեղակալ Ռիչարդ Վերման։ Անցյալ շաբաթ էլ ԱՄՆ պետքարտուղարի մյուս տեղակալն էր՝ Ջեյմս Օ’Բրայանը, և հայ-ամերիկյան գործակցությունը հասցվեց ռազմավարական գործընկերության հանձնաժողովի մակարդակ։ Ջեյմս Օ՛Բրայենը Երևանում մասնակցել էր Հայաստան-Միացյալ Նահանգներ ռազմավարական երկխոսության նիստին, հայտարարել, որ Վաշինգտոնը նաև պաշտպանության, անվտանգության հարցերում է շարունակելու աշխատել Երևանի հետ։ ԱՄՆ-ն և ՀՀ-ն ուզում են ռազմավարական երկխոսությունը փոխարինել ռազմավարական գործընկերության հանձնաժողովով։ Ըստ միջազգային հարաբերությունների մասնագետների՝ այս ստատուսն ստացող երկրում ԱՄՆ-ն կատարում է երկարաժամկետ ներդրում՝ խորացնելու հարաբերությունները։

Գարեգին Միսկարյանը Հայաստանի ռազմավարական ապագան և զարգացումը տեսնում է ԵՄ-ին անդամակցելով և ԱՄՆ-ի հետ գործակցությունը խորացնելով, ինչի համար ըստ նրա՝ ստեղծված են բարենպաստ պայմաններ։ Ըստ նրա՝ ՀՀ-ի ակնկալիքը Արևմուտքից պետք է լինի ժողովրդավարության ամրապնդման հարցում աջակցելու մեջ։ Խոսելով Բագրատ արքեպիսկոպոս Գալստանյանի և նրա առաջնորդած շարժման, հունիսի 12-ին ընդդիմադիր ակտիվիստների և ոստիկանների միջև բախման մասին, պարոն Միսկարյանը համոզված պնդում է, որ գործ ունենք մարող շարժման հետ։

Հարցազրույցն ամբողջությամբ՝ տեսանյութում։

Ռոբերտ Անանյան