07.10.2026 | 23:48
Արթուր Դանիելյանը կալանավորվեց
Գերմանիայի ԱԳ նախարարը նախազգուշացրել է Ուկրաինային հատկացվող օգնության կրճատման ռիսկերի մասին
Քաղաքականություն
17.06.2024 | 12:44
Գերմանիայի ԱԳ նախարար Անալենա Բերբոքը նախազգուշացրել է Ուկրաինային օգնության կրճատման դեպքում Բեռլինի և ՆԱՏՕ-ի համար վտանգավոր հետևանքների մասին, գրում է DW-ի ռուսական ծառայությունը։
«Եթե մենք չշարունակենք օգնել Ուկրաինային, վտանգ կա, որ Պուտինի զորքերը կկանգնեն Լեհաստանի հետ սահմանին, այնուհետև պատերազմն արագ կտարածվի ԵՄ-ի և ՆԱՏՕ-ի տարածքում։ Դժվար է հաշվարկել, թե որքան պետք է վճարենք, եթե ստիպված լինենք ինքներս պաշտպանել մեր ազատությունն ու անկախությունը։ Վերջնարդյունքում այն հանգում է մի բանի՝ Ուկրաինային աջակցությունը թույլ է տալիս պատերազմը պահել հենց մեզանից հեռու»,- ասել է նա Süddeutsche-ին տված հարցազրույցում։
Բերբոքը նաև նախազգուշացրել է փախստականների նոր հոսքի սպառնալիքի մասին։
«Եթե Ուկրաինան այլևս ի վիճակի չլինի պաշտպանել իրեն, և ես այս խոսքերն ուղղում եմ հիմնականում նրանց, որոնք մերժում են Կիևին օգնությունը, ապա միլիոնավոր մարդիկ ստիպված կլինեն փախչել: Ի վերջո, ո՞վ կցանկանա կամավոր ապրել խոշտանգումների և օկուպացիայի պայմաններում»,- նշել է Գերմանիայի ԱԳ նախարարը։
Ըստ նրա՝ ավելի քան մեկ միլիոն ուկրաինացիներ արդեն ապաստան են գտել Գերմանիայում:
Բերբոքը նաև հավելել է, որ պարտությունը ճակատագրական հետևանքներ կունենա ազատ Ուկրաինայի և ազատ Եվրոպայի համար, ուստի անհրաժեշտ է ընդլայնել Կիևին օգնությունը։ Նա կրկին կոչ է արել գործընկերներին ամբողջ աշխարհում շարունակել Ուկրաինային ՀՕՊ համակարգեր մատակարարել։
