24.06.2026 | 05:04
ԱԱ-2026. Խորվաթիան տարավ առաջին հաղթանակը. ՏԵՍԱՆՅՈՒԹ
Մեծ Բրիտանիան, հետևելով ԱՄՆ-ին, պատժամիջոցներ է սահմանել Մոսկվայի բորսայի նկատմամբ
Քաղաքականություն
13.06.2024 | 22:35
Մեծ Բրիտանիայի կառավարությունը թարմացրել է ՌԴ-ի նկատմամբ պատժամիջոցների ցուցակը և դրանում ներառել Մոսկվայի բորսան, Ազգային քլիրինգային կենտրոնը և Ազգային հաշվարկային դեպոզիտարիան, գրում է Meduza-ն։
Նշվում է, որ երեք ֆինանսական կազմակերպությունները մասնակցել և շարունակում են մասնակցել Ռուսաստանի կառավարությանն օգուտներ քաղելու և աջակցելու գործում՝ բիզնես վարելով ռազմավարական նշանակության ոլորտում։ Բրիտանիայի կողմից սահմանված պատժամիջոցները ենթադրում են ակտիվների սառեցում և հավատարմագրային ծառայությունների սահմանափակումներ:
Պատժամիջոցների ցուցակում են «СПБ Биржа»-ն, «Վոլգա-Դնեպր» ավիափոխադրողը, Տամբովի վառոդի գործարանն ու ևս մի շարք իրավաբանական անձինք, ինչպես նաև ընկերություններ Չինաստանից, Ղրղզստանից և Իսրայելից։ Ընդհանուր առմամբ, պատժամիջոցների թարմացված ցանկում ընդգրկված է 35 ընկերություն։
Բացի այդ, պատժամիջոցներ են սահմանվել վեց նավերի նկատմամբ, որոնք կապված են «Ուկրաինայի ապակայունացման» կամ Ռուսաստանի կառավարությանը աջակցելու մեջ։ Սահմանափակումներ են մտցվել նաև յոթ անձանց նկատմամբ, այդ թվում՝ Մոսկվայի բորսայի ղեկավար Յուրի Դենիսովի, «Մեգաֆոնի» նախկին գլխավոր տնօրեն Իվան Տավրինի և Չեչնիայի ղեկավար Ռամզան Կադիրովի եղբորորդու՝ Յակուբ Զաքրիևի նկատմամբ։
Հիշեցնենք, որ ավելի վաղ ԱՄՆ-ն էր հայտարարել նոր պատժամիջոցների փաթեթի մասին՝ ուղղված Ուկրաինայում Ռուսաստանի սանձազերծած շարունակական պատերազմին:
