ՄԱԿ-ի ԱԽ-ն աջակցել է Գազայում հրադադարի մասին ԱՄՆ-ի ծրագրին

ՄԱԿ-ի Անվտանգության խորհուրդն աջակցել է Գազայի հատվածում հրադադարի մասին ԱՄՆ-ի առաջարկած ծրագրին: Այն ներառում է նաև պատանդների աստիճանական ազատ արձակում և իսրայելական զորքերի դուրսբերում այդ հատվածից, գրում է Current time-ը։

Բանաձևին օգտին, որը կոչ է անում Իսրայելին ու ՀԱՄԱՍ շարժմանն ընդունել  ծրագիրը «անհապաղ» և «առանց լրացուցիչ պայմանների», քվեարկել են խորհրդի 15 անդամից 14-ը, Ռուսաստանը ձեռնպահ է մնացել։

Հունիսի սկզբին Իսրայելը համաձայնել էր Գազայի հատվածում ԱՄՆ նախագահ Ջո Բայդենի հրադադարի ծրագրի հիմնական դրույթներին։

Ծրագիրը ներառում է երեք փուլ, որոնցից առաջինը ժամանակավոր զինադադարն է, ՀԱՄԱՍ-ի գրոհայինների կողմից պատանդների ազատ արձակումը և մահացած պատանդների մարմինների փոխանցումը՝ պաղեստինցի բանտարկյալների ազատ արձակման դիմաց: Երկրորդ փուլը նախատեսում է պատանդների վերջնական ազատ արձակում, ռազմական գործողությունների ամբողջական դադարեցում և իսրայելական զորքերի ամբողջական դուրսբերում Գազայից։ Եզրափակիչ փուլում ակնկալվում է ԱՄՆ-ի և միջազգային հանրության աջակցությամբ Գազայի հատվածի վերականգնման միջազգային պլանի նախապատրաստում։

Փաստաթղթում նաև վերահաստատվում է Անվտանգության խորհրդի «անդրդվելի հանձնառությունը»՝ աջակցելու անկախ Պաղեստին պետության ծրագրին:

«Այդ առումով ընդգծվում է Գազայի հատվածն Արևմտյան ափի հետ Պաղեստինի ինքնավարության կառավարման ներքո միավորելու կարևորությունը»,- ասվում է բանաձևում։

Դրանում նաև նշվում է, որ Իսրայելը համաձայնել է ԱՄՆ-ի առաջարկած ծրագրին։ Բանաձևը կոչ է անում պաղեստինյան ՀԱՄԱՍ շարժմանը՝ աջակցել այդ առաջարկին։ Ավելի ուշ խմբավորումը ողջունել է բանաձևի ընդունումը։ Սակայն, ըստ The Guardian-ի, անհասկանալի է մնում՝ արդյո՞ք ՀԱՄԱՍ-ը պատրաստվում է իրականացնել հրադադարի ծրագիրը։