23.02.2026 | 20:00
Իրանի դեմ ԱՄՆ-ի ռազմական գործողությունների վտանգը մեծ է․ դիվանագիտական գործարքի շանսը նվազ է․ Արմեն Պետրոսյան․ ՏԵՍԱՆՅՈՒԹ
Ուկրաինայում խաղաղությունը չի նշանակում, որ Կիևը կմիանա ՆԱՏՕ-ին․ Բայդեն
Քաղաքականություն
04.06.2024 | 21:18
Time ամսագիրը հրապարակել է ԱՄՆ նախագահ Ջո Բայդենի հետ հարցազրույցի սղագրությունը, որն անցկացվել է մայիսի 28-ին։ Ի թիվս այլ հարցերի՝ նրան հարցրել են. «Ինչպիսի՞ն է վերջնախաղն Ուկրաինայում և ինչպիսի՞ տեսք կունենա խաղաղությունն այնտեղ»:
«Խաղաղությունը կլինի երաշխիքի տեսքով, որ Ռուսաստանը երբեք, երբեք, երբեք, երբեք [չորս անգամ կրկնել է] չի օկուպացնի Ուկրաինան։ Ահա թե ինչ տեսք ունի խաղաղությունը։ Եվ դա չի նշանակում ՆԱՏՕ, որ նրանք կլինեն ՆԱՏՕ-ի մաս։ Սա նշանակում է, որ մենք նրանց հետ, ինչպես մյուս երկրների հետ, այնպիսի հարաբերություններ ունենք, որ զենք ենք մատակարարում, որպեսզի նրանք կարողանան պաշտպանվել ապագայում»,- պատասխանել է Բայդենը։
«Հենց ես եմ եղել այն մարդը, ով ասել է, որ պատրաստ չէ աջակցել Ուկրաինայի ՆԱՏՕ-ացումը»,- հավելել է ԱՄՆ նախագահը։
«ՆԱՏՕ-ացում» ասելով՝ նա նկատի ունի ՆԱՏՕ-ին Կիևի լիիրավ անդամակցությունը։
Հարցազրույցի մեկ այլ հատվածում նա քննարկում է Ֆինլանդիայի ՆԱՏՕ-ացումը, որը տեղի ունեցավ Ուկրաինա ռուսական ներխուժումից հետո: Ուկրաինան երկար ժամանակ ձգտում էր անդամակցել ՆԱՏՕ-ին, սակայն դա հանդիպեց դաշինքի մյուս անդամների որոշակի դիմադրությանը:
Անցյալ ամառ Վիլնյուսում ՆԱՏՕ-ի գագաթնաժողովում ընդունվեց կոմյունիկե, որը մեծապես հիասթափեցրեց Ուկրաինայի ղեկավարությանը։
«Ուկրաինայի ապագան ՆԱՏՕ-ում է։ Մենք ի վիճակի կլինենք Ուկրաինային անդամակցության հրավեր ուղարկել, երբ անդամ երկրները գան համաձայնության և երբ պայմանները բավարարվեն»,- ասվում է փաստաթղթում:
Ռուսաստանը 2021 թվականի դեկտեմբերին պատերազմի նախապատրաստման ժամանակ վերջնագիր ներկայացրեց ԱՄՆ-ին և ՆԱՏՕ-ին, որում պահանջում էր երաշխիքներ, որ Ուկրաինան, ինչպես նաև Վրաստանը, երբեք չեն դառնա ՆԱՏՕ-ի անդամ։ Ռուս պաշտոնյաները երբեմն հայտարարում են, որ չեն հրաժարվում այս պահանջից:
