14.12.2025 | 18:20
Թաիլանդն ու Կամբոջան շարունակում են ռազմական գործողությունները
Մեքսիկան առաջին անգամ կին նախագահ կունենա
Քաղաքականություն
03.06.2024 | 11:17
Մեքսիկայի իշխող կոալիցիայի թեկնածու Կլաուդիա Շեյնբաումը վստահ հաղթանակ է տարել երկրի նախագահական ընտրություններում։ Շեյնբաումը, որը նախկինում զբաղեցրել է Մեխիկոյի քաղաքապետի պաշտոնը, ստացել է ընտրողների ձայների 58,3-ից մինչև 60,7 տոկոսը, նախնական հաշվարկներով, հունիսի 3-ին հայտնել է երկրի ընտրական հանձնաժողովը, փոխանցում է DW-ի ռուսական ծառայությունը:
Այն, որ Մեքսիկայի ներկայիս նախագահ Անդրես Մանուել Լոպես Օբրադորի «Ազգային վերածննդի շարժում» (MORENA) կուսակցության ներկայացուցիչը հաղթելու է այս ընտրություններում, վկայում էին նաև exit poll-ի արդյունքները։
Ըստ նույն նախնական հաշվարկների՝ Շեյնբաումի գլխավոր հակառակորդի՝ «Ուժ և սիրտ Մեքսիկայի համար» աջակողմյան կուսակցությունների դաշինքից նախկին սենատոր Սոչիտլ Գալվեսի օգտին քվեարկել է ընտրողների 26,6-ից 28,6 տոկոսը։
Երրորդ ամենահայտնի թեկնածուն՝ Խորխե Ալվարես Մեյնսը «Քաղաքացիական շարժում» կուսակցությունից, չի ապահովել այնպիսի աջակցություն, որը նրան հնարավորություն կտար հետագա առճակատման: Մեքսիկայի ընտրական հանձնաժողովի նախնական արդյունքները ցույց են տվել, որ Շեյնբաումը ստացել է ձայների 60 տոկոսը՝ քվեաթերթիկների երկու տոկոսը հաշվելուց հետո:
Համընդհանուր ընտրությունների նախնական արդյունքները կհրապարակվեն ավելի ուշ։
