Բլինքենը մեկնում է Արևելյան Եվրոպա Ուկրաինայի, Մոլդովայի և Վրաստանի հետ կապված մտահոգությունների ֆոնին

ԱՄՆ պետքարտուղար Էնթոնի Բլինքենն այս շաբաթ կայցելի Արևելյան Եվրոպա՝ Ուկրաինայում Ռուսաստանի առաջխաղացումների, Մոլդովայում Ռուսաստանի հնարավոր միջամտության և Վրաստանում մոսկվայամետ օրենսդրության ընդունման հետ կապված աճող մտահոգությունների ֆոնին, գրում է VOA-ն:
Բլինքենը Մոլդովայի մայրաքաղաք Քիշնև կժամանի չորեքշաբթի, իսկ հինգշաբթի և ուրբաթ օրը Պրահայում կմասնակցի ՆԱՏՕ-ի արտգործնախարարների հանդիպմանը։
Հանդիպումը կլինի վերջին խոշոր դիվանագիտական հավաքը մինչև հուլիսին Վաշինգտոնում կայանալիք ՆԱՏՕ-ի 80-ամյակին նվիրված առաջնորդների գագաթնաժողովը:
Ուղևորությունը տեղի է ունենում Բլինքենի՝ Ուկրաինա կատարած անսպասելի այցից երկու շաբաթ անց, որի ընթացքում նա վստահեցրել է Կիևին Վաշինգտոնի աջակցության մեջ՝ երկրի հյուսիսում ռուսական հարձակումների ուժեղացման պայմաններում:
Ըստ որոշ նշանների՝ Ռուսաստանը դիտարկում է նոր քայլեր Մոլդովայում և կանգնած է Վրաստանում հակաարևմտյան քայլերի հետևում, որոնք, ըստ ԱՄՆ-ի, հակասում են Մոլդովայի և Վրաստանի՝ Եվրոպային ինտեգրվելու ցանկությանը:
Քիշնևում Բլինքենը կհանդիպի Մոլդովայի նախագահ Մայա Սանդուի հետ՝ վերահաստատելու ԱՄՆ աջակցությունը Մոլդովայի առաջընթացին ԵՄ-ին անդամակցելու հարցում, հայտնել է Պետդեպարտամենտը:
Եվրոպայի գծով ԱՄՆ-ի գլխավոր դիվանագետ Ջեյմս Օ’Բրայենն ասել է, որ Բլինքենը կհայտարարի Մոլդովային աջակցության «հզոր» փաթեթի մասին, որտեղ 1500 ռուս զինվորականներ տեղակայված են Մերձդնեստրի վիճելի տարածքում:
«Այս պահին մենք ուղղակի ռազմական սպառնալիք չենք տեսնում, սակայն ռուսական ազդեցության գործողությունները շարունակվում են, և դա մտահոգիչ է», – լրագրողներին ասել է Օ՛Բրայենը՝ չմանրամասնելով աջակցության փաթեթին։
Մոլդովան բազմիցս մեղադրել է Ռուսաստանին երկրի դեմ «հիբրիդային պատերազմ» մղելու, տեղական ընտրություններին միջամտելու և իշխանությունը տապալելու և երկիրը ԵՄ-ին անդամակցելու ճանապարհից շեղելու համար զանգվածային ապատեղեկատվական արշավներ վարելու մեջ:
Ռուսաստանը հերքում է մեղադրանքները, սակայն Մոլոդովայի կառավարությունը զգուշանում է Մոսկվայի մտադրություններից։ Այդ մտավախությունները սրվեցին այն բանից հետո, երբ փետրվարին Մերձդնեստրի իշխանությունները «պաշտպանություն» խնդրեցին Ռուսաստանից՝ Քիշնևի ճնշումների պատճառով:
Չնայած Ուկրաինան լինելու է օրակարգի գլխավոր թեման, ՆԱՏՕ-ի նախարարները կքննարկեն նաև Վրաստանում տեղի ունեցող զարգացումները, որը, ինչպես Ուկրաինան, ձգտում է անդամակցել ՆԱՏՕ-ին: Երկրում հակասություններ կան մի օրինագծի շուրջ, որը, շատերի կարծիքով, ընդունվել է Մոսկվայի ազդեցության ներքո՝ Վրաստանի արևմտյան նկրտումները խափանելու նպատակով: