15.01.2025 | 15:16
«Հայ ազգային կոնգրեսը» կմիանա՞ Մարությանին․ Զուրաբյանը չբացառեց․ ՏԵՍԱՆՅՈՒԹ
Գերմանիան հավանություն է տվել 2006թ․ ի վեր զենքի ամենամեծ արտահանմանը Թուրքիա
Քաղաքականություն
13.12.2024 | 23:31
Գերմանիան հավանություն է տվել 230,8 միլիոն եվրո (250 միլիոն դոլար) արժողությամբ զենքի արտահանմանը Թուրքիա, ինչն ամենաբարձր ցուցանիշն է 2006 թվականից ի վեր, քանի որ Բեռլինը վերսկսում է արտահանման թույլտվություններն ավելի մեծ մասշտաբով երկար տարիների սահմանափակումներից հետո: Այս մասին հաղորդել է գերմանական Handelsblatt-ը, որին վկայակոչում է Turkish Minute-ը։
Գերմանիայի կառավարությունը տարիների ընթացքում առաջին անգամ կանաչ լույս է վառել ՆԱՏՕ-ի դաշնակից Թուրքիային սպառազինությունների լայնածավալ արտահանման համար։ Որոշումն ընդունել է Անվտանգության դաշնային խորհուրդը՝ կանցլեր Օլաֆ Շոլցի նախագահությամբ։
Համաձայն ցուցակի, որը հայտնվել է Der Spiegel-ի տրամադրության տակ, զենք արտադրող MBDA-ն Թուրքիային կտրամադրի 100 կառավարվող հրթիռ նավերի հակաօդային պաշտպանության համար, մինչդեռ Thyssenkrupp’s Marine Systems-ը կմատակարարի 28 SeaHake DM2A4 տորպեդ՝ 156 միլիոն եվրո արժողությամբ:
Գերմանական տարբեր կոնսորցիումներ ստացել են թուրքական U209 սուզանավերի արդիականացման համար 79 մլն եվրո արժողությամբ նյութերի փաթեթներ, ինչպես նաև 1,9 մլն եվրո արժողությամբ թուրքական կորվետների և ֆրեգատների շարժիչների մասեր մատակարարելու թույլտվություն։ Սպասվում է, որ սպառազինության ընդհանուր արտահանումը կկազմի շուրջ 336 միլիոն եվրո։
Գերմանացի պատգամավոր Սևիմ Դաղդելենի խորհրդարանական հարցմանը էկոնոմիկայի դաշնային նախարարության պատասխանի համաձայն՝ հաստատված արտահանումը ներառում է 79,7 միլիոն եվրոյի ռազմական զենք և 151,1 միլիոն եվրո արժողությամբ այլ զինտեխնիկա։
Գերմանական օրենսդրության համաձայն՝ պաշտպանական կապալառուները պետք է ստանան կառավարության հավանությունը՝ նախքան երկրում մշակված զենքն ու ռազմական տեխնիկան օտարերկրյա գնորդներին վաճառելը:
Վերջին տարիներին Բեռլինը կտրուկ կրճատել էր զենքի արտահանումը Թուրքիա՝ հարաբերություններում լարվածության ֆոնին, որը պայմանավորված էր նախագահ Ռեջեփ Թայիփ Էրդողանի՝ երկրում քննադատների դեմ քաղաքականությամբ և Սիրիայում ու Իրաքում քրդական խմբավորումներին ուղղված ռազմական գործողություններով։ Գերմանիայի կառավարությունը հոկտեմբերին սկսեց վերացնել այդ սահմանափակումները։
Կանցլեր Շոլցը պաշտպանել է մատակարարումները Ստամբուլ կատարած այցի ժամանակ։
«Թուրքիան ՆԱՏՕ-ի անդամ է, ուստի մենք անընդհատ որոշումներ ենք կայացնում, որոնք հանգեցնում են կոնկրետ առաքումների: Սա անկասկած է»,- ասել էր նա Թուրքիայի նախագահ Էրդողանի հետ բանակցություններից հետո:
Շոլցը խոսել էր նաև Eurofighters-ի մատակարարման մասին՝ մատնանշելով Մեծ Բրիտանիայի և Թուրքիայի միջև ընթացող բանակցությունները։
Որոշումը կայացվել է Թուրքիայի և Գերմանիայի միջև համաձայնության ֆոնին այն թուրքերի արտաքսման վերաբերյալ, որոնց Գերմանիայում ապաստան ստանալու հայցերը մերժվել են: Գերմանական Frankfurter Allgemeine-ի փոխանցմամբ՝ ավելի քան 13,500 թուրքեր աստիճանաբար կարտաքսվեն Թուրքիա, թեև թուրքական կառավարությունը հերքել է այդ լուրերը։
Թարգմանությունը՝ Էմմա Չոբանյանի
