Բետիսն առաջընթաց է Թիկնիզյանի համար․ Գուրենկո

Մոսկվայի «Լոկոմոտիվի» և իսպանական «Ռեալ Սարագոսայի» նախկին ֆուտբոլիստ Սերգեյ Գուրենկոն Legalbet-ին տված հարցազրույցում խոսել է «Լոկոմոտիվի» ֆուտբոլիստ Նաիր Թիկնիզյանի՝ «Բետիս» հնարավոր տեղափոխության մասին. գրում է armsport-ը։

«Ուրախ եմ, որ Թիկնիզյանով հետաքրքրվում են։ Նա լավ և կայուն եզրային պաշտպան է։ Տղան արժանի է դրան։ Բայց նա դեռ միայն տրանսֆերային ցուցակում է, դեռ չի տեղափոխվել։ Պայմանագրերը, ընդհանուր առմամբ, լռություն են սիրում։  Չի կարելի, որ տեղեկությունները արտահոսեն։ Երբ ամեն ինչ լուռ է և առանց շտապողականության, պայմանագիր ստորագրելու հնարավորությունները ավելի մեծ են դառնում։ Ես դա իմ փորձով եմ գիտակցել։

«Լոկոմոտիվը» Եվրոպայում հայտնի անուն ունի, ակումբին ճանաչում են։ Բայց «Բետիսն» առաջընթաց է «Լոկոմոտիվի» համեմատ, հատկապես հիմա։ Բացի այդ, տուն վերադառնալու համար միշտ էլ ժամանակ կունենաս։ Իսպանիայի առաջնությունում խաղալը մեծ քայլ է։ Մեր առաջնության մակարդակը հիմա ընդհանրապես համեմատելու բան չէ, մենք ոչ մի բան չենք ներկայացնում»,- ասել է Գուրենկոն Legalbet-ի թղթակից Դմիտրի Բեբյակինին։

Ավելի վաղ Legalbet-ը հայտնել էր, որ Թիկնիզյանը «Բետիսի» ամառային տրանսֆերային պատուհանում թիմի ուժեղացման նպատակով կազմված ցուցակում է։

Թիկնիզյանը «Լոկոմոտիվում» հանդես է գալիս 2021 թվականից։ Ընթացիկ մրցաշրջանում 25-ամյա պաշտպանը մասնակցել է բոլոր մրցաշարերի շրջանակներում անցկացված 22 խաղերի, որոնցում խփել է երկու գոլ և կատարել մեկ գոլային փոխանցում։ Ֆուտբոլիստի պայմանագիրը «Լոկոմոտիվի» հետ ուժի մեջ է մինչև 2026 թվականի ամառը։ Transfermarkt ինտերնետային պորտալի գնահատմամբ՝ հայ ֆուտբոլիստի արժեքը կազմում է 6,5 միլիոն եվրո։

Իսպանիայի Լա Լիգայի 16 տուրերից հետո «Բետիսը» 21 միավորով զբաղեցնում է 11-րդ տեղը։ 2022 թվականին թիմը հաղթել է Իսպանիայի գավաթը։