Եկեղեցիները դառնում են կուսակցական գրասենյակներ․ դրանք հայ ժողովրդի սեփականությունն են, ո՛չ՝ մի քանի մարդու․ Թագուհի Ղազարյան. ՏԵՍԱՆՅՈՒԹ

Սրվել են Հայաստանի կառավարող «Քաղաքացիական պայմանագիր» կուսակցության և Հայ աառքելական եկեղոցու հարաբերությունները։ Օրերս ՀՀ ԱԺ նախագահ Ալեն Սիմոնյանը ԱԺ ամբիոնից ասում էր, որ անհրաժեշտ է քննարկել, մտածել՝ Հայ առաքելական եկեղեցուն հարկելու մասին։ Նա հիմնավորում էր, որ եթե բիզնեսմենը ՀՀ բանակի համար փամփուշտի գումար է վճարում պետական գանձարան՝ որպես հարկ, ինչո՞ւ նույնը չպիտի անի ՀԱԵ-ն։

Բագրատ Արքեպիսկոպոս Գալստանյանը արձագանքել է Ալեն Սիմոնյանի հայտարարությանը` նշելով, որ հետխորհրդային բոլոր երկրներից միայն ՀՀ-ում է, որ եկեղեցին ոչ մի գումար չի ստանում պետությունից՝ իր իսկ ցանկությամբ, որ վնաս չհասցնի պետությանը, ինքը հոգա իր կարիքները։

«Մենք հարկերը վճարում ենք, որ դուք գնաք պարգևավճար ստանաք»։ Իսկ Ասողիկ աբեղա Կարապետյանը գրել է․ «Մի՛ խեղաթյուրեք, հարգարժան խորհրդարանցիներ, իրականությունը. Հայոց Եկեղեցին միշտ էլ և պարտաճանաչ կերպով հարկ է տվել՝ ջրի, գազի, էլեկտրաէներգիայի և այլ տեսակի հարկերը»: Նաև նշում են՝ իշխանությունը ստում է, որ եկեղեցին ամբողջապես հարկվում է։

Բագրատ Արքեպիսկոպոս Գալստանյանը նշել է, որ «հատուցման պահանջ պետք է դնել այս մարդկանց առջև։ 19-րդ դարի եկեղեցիներ ունենք, որոնց բռնագրավված են, ավերակների են վերածված, հայ եկեղեցու գույքը, հոգևոր մշակութային արժեքները, եկեղեցիները պետք է վերադարձվեն եկեղեցուն, այն տեսքով, ինչ տեսքով իրենք բռնագրավել են»։ Նույնպիսի պահանջ է դրել նաև Շիրակի թեմի առաջնորդը։ Ավելի ուշ Ալեն Սիմոնյանը գրառում է արել՝ նշելով այն արտոնությունները՝ հարկից ազատման տեսքով, որ ունի եկեղեցին՝ Հարկային օրենսգրքի 230-րդ հոդված՝ Եկեղեցուն սեփականության և անհատույց մշտական օգտագործման իրավունքով պատկանող, կրոնական, պաշտամունքային անշարժ գույքը, Եկեղեցուն պատկանող` հուշարձանի կարգավիճակ չունեցող եկեղեցիները, հոգևոր-մշակութային, կրթադաստիարակչական, եկեղեցական և ծիսական պարագաների արտադրության և իրացման համար օգտագործվող անշարժ գույքը, Եկեղեցու ներքին սպասարկումն իրականացնող արհեստանոցները և դրանց անշարժ գույքը: Եկեղեցին ազատվում է նաև ԱԱՀ-ի հարկումից։ Հարկերից ազատված են՝ կրոնական ծիսակատարությունների կազմակերպման ծառայությունների մատուցումը, կրոնական կազմակերպություններին կրոնական պարագաների օտարումը, ինչպես նաև կրոնական կազմակերպությունների կողմից այդ պարագաների օտարումը։

ԱԺ «Քաղաքացիական պայմանագիր» խմբակցության պատգամավոր Թագուհի Ղազարյանը Factor TV-ի հետ զրույցում ասում է․ «Եկեղեցին պիտի հարկվի ամբողջապես, հատկապես, որ կան խոսակցություններ, որ նրանք տնտեսական այլ տիպի գործունեություն են ծավալում։ Եկեղեցականները պայքարը բազառի տրամաբանությամբ են տանում՝ մեզ մի հարկեք, արտոնություն տվեք, գնանք տներով։ Տարօրինակ է նաև Եկեղեցու պահանջը կառավարությանը՝ գյուղեր վերադարձնելու մասին, ի՞նչ եք անելու, պարսպապատելո՞ւ եք»։ Թագուհի Ղազարյանը պնդեց նաև, որ հոգևորականները եկեղեցիները դարձնում են կուսակցական գրասենյակներ, մինչդեռ դրանք հայ ժողովրդի սեփականությունն են, ո՛չ՝ մի քանի մարդու։ Իսկ վարչապետ դառնալու վերաբերյալ Բագրատ արքեպիսկոպոս Գալստանյանի առաջարկը սահմանադրական կարգի տապալման է նմանեցնում, պդնելով, որ կա սահմանադրական արգելք։

Հարցազրույցն ամբողջությամբ՝ տեսանյութում։

Ռոբերտ Անանյան