06.06.2026 | 01:06
«Ուժեղ Հայաստանի» մասնակցությունը կվիճարկվի՞ Վարչական դատարանում, թե՞ ոչ․ «Հանրապետության» անդամը՝ իրենց որոշման մասին
Որքանով են հրակայուն նոր զորանոցները. ՊՆ-ից արձագանքում են քննադատություններին. ՏԵՍԱՆՅՈՒԹ
Քաղաքականություն
21.05.2024 | 22:01
Պաշտպանության նախարար Սուրեն Պապիկյանը երեկ այցելել է վերջերս շահագործման հանձնված մարտական հերթապահություն իրականացնող գումարտակներից մեկի մշտական տեղակայման վայր։ Նախարարությունը հրապարակել է նաև շինության լուսանկարները։
Վարչապետի աշխատակազմի ղեկավար Արայիկ Հարությունյանը մոդուլային զորանոցների կառուցումը մեծ բարեփոխում է համարում։
«Պաշտպանական ոլորտում մեծ բարեփոխումներն իրականություն են դառնում՝ նոր որակ հաղորդելով մեր զինված ուժերին»,- գրել է Հարությունյանը։
Խորհրդարանական «Պատիվ ունեմ» խմբակցության քարտուղար Տիգրան Աբրահամյանն ընդգծում է՝ ռազմական ենթակառուցվածքների կառուցումը բարեփոխում չէ, այլ Զինված ուժերում շարունակական գործընթացի մաս։
Նախարարության հրապարակումը որոշ օգտատերերի մոտ քննադատության ալիք է բարձրացրել․ շատերը մատնանշում են ներքին հարդարումը, որը, դատելով լուսանկարներից, արված է փայտանյութից։ Պաշտպանական գերատեսչությունից վստահեցնում են, որ շենք-շինությունների ներքին հարդարումն իրականացված է հակահրդեհային, հրակայուն և հականեխիչ նյութերով մշակված փայտատաշեղային սալերով:
Ազատի զինվորական կացարանի ողբերգությունից հետո, երբ տարածվեցին այրված կացարանի լուսանկարները, պարզվեց, որ զինվորների համար նվազագույն պայմաններ ապահովված չեն եղել։ Հանրության շրջանում սկսեց քննարկվել այն հարցը, թե ինչու էին զինծառայողները տեղակայված նման վատ պայմաններով կացարանում։ Նախարարությունը նախ հայտնեց, որ զինվորներն այդ կացարանում տեղակայվել էին ժամանակավոր՝ մինչև մշտական տեղակայման վայրի կառուցման ավարտը։ 15 զինվորի կյանք խլած ողբերգությունից հետո միայն պաշտպանական գերատեսչությունը հայտնեց, որ մոդուլային զորամասեր է պատվիրել։ Պատգամավոր Տիգրան Աբրահամյանի կարծիքով՝ տվյալ կացարանները որպես հիմնական լուծում չեն կարող ծառայել։
Իշխանական պատգամավոր Գագիկ Մելքոնյանը համամիտ չէ դիտարկման հետ, թե միայն Ազատի զինվորական կացարանի հրդեհից հետո մոդուլային զորանոցների կառուցման թեման դարձավ արդիական։
Օրվա ավարտին նախարարությունը տեսանյութ հրապարկեց մեկ այլ գումարտակի նորակառույց մշտական տեղակայման վայրից։ Նախարար Սուրեն Պապիկյանը շրջել ու ծանոթացել է նոր շահագործման հանձնված զորանոցի պայմաններին։
Մանրամասները՝ տեսանյութում։
Արփի Հակոբյան
