26.06.2026 | 12:02
Շախմատի աշխարհի 14-18 տարեկանների առաջնության ավարտին մնացել է մեկ խաղափուլ․ հայ պատվիրակների արդյունքները
Բայրամովն Իրանի ԱԳ նախարարի պաշտոնակատարի հետ քննարկել է Թեհրանում Ադրբեջանում դեսպանատան աշխատանքը վերսկսելու միջոցառումները
21.05.2024 | 22:59
Ադրբեջանի ԱԳ նախարար Ջեյհուն Բայրամովը հեռախոսազրույց է ունեցել Իրանի ԱԳ նախարարի պաշտոնակատար Ալի Բաղերի Քանիի հետ։ Ադրբեջանական կողմի փոխանցմամբ՝ Բայրամովը ցավակցություն է հայտնել ուղղաթիռի կործանման հետևանքով Իրանի նախագահի, արտաքին գործերի նախարարի և ուղեկցող այլ անձանց մահվան կապակցությամբ։
Նա նշել է, որ հանգուցյալ ԱԳ նախարար Հոսեյն Ամիր Աբդոլլահիանի հետ հաստատվել են անկեղծ և մասնագիտական կապեր, և հանդիպումները նպաստել են երկու երկրների հարաբերությունների զարգացմանն ու այն հարցերի լուծմանը, որոնց շուրջ եղել են տարաձայնություններ։ Հեռախոսազրույցի ընթացքում նշվել է սահմանին երկու երկրների ղեկավարների հանդիպման պատմական նշանակությունը, ռազմավարական նախագծերի իրագործումը սկսելու և տրանսպորտի, տնտեսության և էներգետիկայի ոլորտներում ծրագրերի իրականացման ուղղությամբ համատեղ ջանքերը շարունակելու կարևորությունը։
Բայրամովը նաև ասել է, որ միջոցներ են ձեռնարկվել Իրանում Ադրբեջանի դեսպանատան գործունեությունը վերականգնելու ուղղությամբ։
Զրույցի ընթացքում մտքեր են փոխանակվել փոխադարձ հետաքրքրություն ներկայացնող այլ հարցերի շուրջ։
Օրերս Ադրբեջանի ԱԳՆ խոսնակ Այխան Հաջիզադեն հայտնել էր, որ Բաքուն պատրաստվում է վերսկսել Իրանում իր դեսպանատան աշխատանքը։ Ըստ ադրբեջանցի պաշտոնյայի՝ քննարկվել է դեսպանատան տեղակայման նոր վայրի հարցը, որը կլինի ավելի անվտանգ և կհամապատասխանի դիվանագիտական առաքելության համար անհրաժեշտ պահանջներին։
«Արդյունքում որոշվել է դեսպանատան նոր վայրը։ Անհրաժեշտ աշխատանքների ավարտից հետո նախատեսվում է դեսպանության գործունեությունը վերսկսել նոր վայրում»,- ասել էր Հաջիզադեն։
2023 թվականի հունվարի 27-ին Իրանում Ադրբեջանի դեսպանատան վրա զինված հարձակման հետևանքով մեկ մարդ էր զոհվել, երկուսը՝ վիրավորվել։ Պաշտոնական Բաքուն դեսպանատան վրա իրականացված հարձակումն «ահաբեկչություն» էր որակել։ Միջադեպից հետո Բաքուն տարհանել էր Թեհրանում Ադրբեջանի դեսպանատան աշխատակիցներին։ Մինչ օրս դեսպանատան գործունեությունը դադարեցված է։
Էմմա Չոբանյան
