Լեհաստանում ձերբակալվել են ՌԴ-ի պատվերով դիվերսիա կազմակերպելու մեջ կասկածվողներ

Լեհաստանի իշխանությունները ձերբակալել են 9 մարդու՝ Ռուսաստանի հետախուզական ծառայությունների պատվերով դիվերսիա կատարելու կասկածանքով։ DW-ի ռուսական ծառայության փոխանցմամբ՝ այս մասին հայտարարել է երկրի վարչապետ Դոնալդ Տուսկը։

«Դա վերաբերում է ծեծերին, հրկիզումներին, հրկիզումների փորձին»,- ասել է նա՝ նշելով, որ խոսքը վարձկանների մասին է։

Տուսկի խոսքով՝ «երբեմն դրանք հանցագործ աշխարհի մարդիկ են, դա վերաբերում է Ուկրաինայի, Բելառուսի և Լեհաստանի քաղաքացիներին»։ Մասնավորապես, կանխվել է Լեհաստանի արևմտյան Վրոցլավ քաղաքում ներկերի գործարանը հրկիզելու փորձը։ Հրկիզումը, «անկասկած, պատվիրվել է ռուսական ծառայությունների կողմից», կարծում է Տուսկը։

Լեհաստանի վարչապետն իրավիճակը գնահատել է շատ լուրջ՝ հիշեցնելով, որ նմանատիպ դիվերսիաներ տեղի են ունենում Լիտվայում, Լատվիայում և Շվեդիայում։ Նա հիշեցրել է մայիսի 9-ի գիշերը Վիլնյուսում IKEA խանութի պահեստում բռնկված հրդեհը։ Հաստատությունում ապրանքներ են այրվել, Լիտվայի ոստիկանությունը հետաքննում է նաև հրկիզման հավանականությունը։

Լեհաստանի նախագահ Անջեյ Դուդան մայիսի 14-ին հայտարարել էր, որ վերջին օրերին երկրի տարբեր շրջաններում մի քանի լուրջ հրդեհներ են տեղի ունեցել։ Նրա խոսքով՝ դժվար է չկասկածել, որ «դրանք կարող են հրկիզում լինել, բայց իրականում սա երկրում իրավիճակն ապակայունացնելու փորձ է»։ Լեհաստանի ազգային անվտանգության բյուրոյի ղեկավար Յացեկ Սևիերան իր հերթին ենթադրել է, որ օտարերկրյա հետախուզական ծառայությունները կարող են կապ ունենալ տեղի ունեցողի հետ։