25.04.2026 | 19:00
Գուցե կան տողատակեր, որոնցից տեղյակ չենք, բայց չենք կարող Ցեղասպանության վրա խաչ քաշել. Արա Գևորգյան․ ՏԵՍԱՆՅՈՒԹ
Թուրքիայի քրդամետ կուսակցության նախկին նախագահ Սելահաթթին Դեմիրթաշը դատապարտվել է 42 տարվա ազատազրկման
Քաղաքականություն
17.05.2024 | 12:47
Անկարայի 22-րդ բարձր քրեական դատարանը Քոբանիի ցույցերի գործով վերջնական դատավարությունն է անցկացրել։ Գործով անցնում է 108 մեղադրյալ, որոնցից 28-ը՝ կալանավորված, գրում են թուրքական լրատվամիջոցները։
Քոբանիի ցույցերը տեղի են ունեցել 2014 թվականի հոկտեմբերի 6-8-ը, որի հետևանքով մահացել են տասնյակ մարդիկ։ Ցուցարարներն այն ժամանակ հեղեղել էին փողոցները Թուրքիայի հիմնականում քրդաբնակ հարավ-արևելյան շրջաններում՝ վրդովված սիրիացի քրդերին պաշտպանելու՝ թուրքական կառավարության անգործությունից, երբ ԻԼԻՊ-ը պաշարել էր Քոբանին՝ Սիրիայի սահմանից այն կողմ:
Ամբաստանյալները մեղադրվում են մի շարք հանցագործությունների մեջ, այդ թվում՝ 37 մարդու սպանության և «պետության միասնությունն ու ամբողջականությունը խախտելու մեջ»։
Դատարանը քրդամետ HDP կուսակցության նախկին համանախագահ Սելահաթթին Դեմիրթաշին դատապարտել է ընդհանուր 42 տարվա ազատազրկման։ Այս դատավճռի 20 տարին, իբր, «պետության միասնությունն ու ամբողջականությունը խաթարելու» համար է։ Նշենք, որ Դեմիրթաշը բանտում է 2016 թվականի նոյեմբերից՝ ահաբեկչության հետ կապված մեղադրանքներով։ Նա ազատ չէր արձակվում՝ չնայած Մարդու իրավունքների եվրոպական դատարանի որոշումներին։
HDP-ի նախկին համանախագահ Ֆիգեն Յուքսեքդաղը դատապարտվել է 30 տարի և 3 ամիս ազատազրկման։ Դատարանը նրա նկատմամբ նշանակված ցմահ ազատազրկումը կրճատել է մինչև 19 տարվա՝ «պետության միասնությունը և երկրի ամբողջականությունը խախտելու համար»։
Դատարանը Մարդինի քաղաքապետ Ահմեթ Թյուրքին դատապարտել է 10 տարվա, իսկ Դիարբեքիրի նախկին քաղաքապետ Գյուլթան Քըշանաքին՝ 12 տարվա ազատազրկման՝ «զինված ահաբեկչական կազմակերպության անդամ լինելու համար»։ Հաշվի առնելով Քըշանաքի կալանքի տևողությունը՝ նա ազատ է արձակվել դատական հսկողությամբ։ Քըշանաքը բանտում էր 2016 թվականից։
Քրդամետ «Ժողովուրդների իրավահավասարություն և ժողովրդավարություն» (DEM) կուսակցության համանախագահ Թուլայ Հաթիմօղուլլարը դատավճիռները համարել է «օրենքի ջարդ»։
Հիմնական ընդդիմադիր Ժողովրդահանրապետական կուսակցության ղեկավար Օզգյուր Օզելն էլ Sözcü հեռուստաընկերության ուղիղ եթերում ասել է, որ դատական գործընթացն «օրինական չէր»:
