24.02.2026 | 12:50
Ռուբեն Ռուբինյանի ճեպազրույցը. ՈՒՂԻՂ
ՆԱՏՕ-ն հայտարարել է ՌԴ-ի հետ պատերազմի դեպքում Կալինինգրադը «չեզոքացնելու» պլանների մասին
Քաղաքականություն
09.05.2024 | 17:42
Ռուսաստանի և ՆԱՏՕ-ի միջև զինված հակամարտության դեպքում ՆԱՏՕ-ի զորքերը պետք է «չեզոքացնեն» Կալինինգրադը, ասել է Եվրոպայում ՆԱՏՕ-ի նախկին հրամանատար Ջեյմս Ստավրիդիսը:
«Պատերազմի դեպքում Կալինինգրադը պետք է չեզոքացվի, որպեսզի ռուսական ցամաքային ուժերը, որոնք, հավանաբար, գործում են Մոսկվայի վասալ պետության՝ Բելառուսի միջոցով, վերահսկողության տակ չառնեն Սուվալկիի կարևորագույն միջանցքը, որն անցնում է Լիտվայի և Լեհաստանի սահմանի երկայնքով»,- նշել է նա Bloomberg-ի համար գրված հոդվածում։
Նրա խոսքով՝ ՆԱՏՕ-ին Ֆինլանդիայի և Շվեդիայի միանալուց հետո դաշինքը կարող է օգտագործել Բալթիկ ծովը Կալինինգրադի վրա ճնշում գործադրելու համար, որն «աշխարհագրական սեպ» է դաշինքի մյուս անդամների միջև: Նա հավելել է, որ Բալթյան նավատորմի հիմնական մասը տեղակայված է Կալինինգրադի մարզում, և ինքնին քաղաքն ունի զգալի օդային ու հրթիռային ուժեր:
Ըստ Ստավրիդիսի՝ դաշինքի անդամները պետք է զգուշանան Բալթյան երկրներ ռուսական ներխուժման սպառնալիքից։
«Այս սպառնալիքը ոմանց համար կարող է չափազանցված թվալ. որքա՞ն են շանսերը, որ Պուտինը ծովում մեծ ճգնաժամ կստեղծի կամ կներխուժի Բալթյան երկրներից մեկը: Դե, երեք տարի առաջ այն միտքը, որ նա հարձակվելու է Ուկրաինայի վրա, նույնպես անհավանական էր թվում»,- ընդգծել է Եվրոպայում ՆԱՏՕ-ի նախկին հրամանատարը։
Ավելի վաղ նմանատիպ հայտարարություն էր արել Շվեդիայում Լիտվայի դեսպան Լինաս Լինկյավիչուսը։
«Այն բանից հետո, երբ Շվեդիան ինտեգրվեց դաշինքին, Բալթիկ ծովը դարձավ ՆԱՏՕ-ի ներքին ծով։ Եթե Ռուսաստանը համարձակվի մարտահրավեր նետել ՆԱՏՕ-ին, ապա առաջինը Կալինինգրադը «կչեզոքացվի»»,- գրել էր նա X սոցիալական ցանցում։
