Չինաստանում հորդառատ անձրևները մայրուղու փլուզման պատճառ են դարձել․ տասնյակ զոհեր և վիրավորներ կան

Չինաստանի հարավային Գուանդուն նահանգի Մեյչժոու քաղաքի մոտակայքում արագընթաց մայրուղու մի հատվածի փլուզման հետևանքով զոհվել է 24 մարդ, հայտնել է Չինաստանի կենտրոնական հեռուստատեսությունը՝ վկայակոչելով տեղի իշխանություններին։ Մայրուղու փլուզման պատճառ են դարձել Գուանդուն նահանգում առատ տեղումները, գրում է DW-ի ռուսական ծառայությունը։

«Ժամը 15։00-ի դրությամբ՝ փլատակների տակ հայտնաբերվել է 20 ավտոմեքենա, ընդհանուր առմամբ, տուժել է 54 մարդ, որոնցից 24-ի մահը հաստատվել է»,- ասվում է հաղորդագրության մեջ։

Մյուս 30 տուժածները գտնվում են հիվանդանոցում, նրանց կյանքին վտանգ չի սպառնում։

Գուանդուն նահանգից Ֆուցզյան նահանգ տանող մայրուղու փլուզված հատվածի երկարությունը մոտ 18 մետր է, մակերեսը՝ մոտ 185 ք/մ։ Դեպքի վայրում աշխատում են արտակարգ իրավիճակների մոտ 500 աշխատակիցներ: Մայրուղին երկու ուղղություններով փակ է։

Գուանդուն նահանգի համար առատ տեղումները հազվադեպ չեն, սակայն այս պահին դրանք անսովոր առատ են, գրում է dpa-ը՝ հավելելով, որ Պերլ գետի դելտայում հորդառատ առուները վտանգավոր հեղեղումներ են առաջացրել։ Ջրհեղեղներ են գրանցվել նաև Գուանչժոուի հյուսիսում և հարավում գտնվող քաղաքներում և գյուղերում:

Չինաստանի լեռնային շրջաններում առատ տեղումների ժամանակ հատկապես մեծ է սողանքների վտանգը։ Հունվարի վերջին երկրի հարավ-արևմուտքում գտնվող գյուղերից մեկում զանգվածային սողանքի հետևանքով զոհվել է ավելի քան 30 մարդ։ Ամեն տարի Չինաստանում մի քանի հարյուր մարդ է մահանում փոթորիկների, ջրհեղեղների և այլ բնական աղետների հետևանքով։