22.07.2026 | 14:51
ՀՀ-ում է Վրաստանի ռազմական ոստիկանության պատվիրակությունը․ քննարկվել է համագործակցության ընդլայնումը
Ադրբեջանն ավերել է Շուշիի Ղազանչեցոց հայկական գերեզմանոցը
Քաղաքականություն
23.04.2024 | 14:41
Ադրբեջանը շարունակում է Արցախից հայկական հետքերի վերացման պետական քաղաքականությունը։ Caucasus Heritage Watch-ն իր սոցիալական հարթակներում ահազանգում է՝ ապրիլի 4-ի արբանյակային լուսանկարները ցույց են տալիս, որ ադրբեջանական կողմն ավարտել է Շուշիի հայկական Ղազանչեցոց գերեզմանատան ավերումը։
«Սա գերեզմանոցի առաջին ավերումն է այն բանից հետո, երբ Արդարադատության միջազգային դատարանն Ադրբեջանին հանձնարարել էր կանխել և պատժել հայկական մշակութային ժառանգության դեմ հարձակումները: Գերեզմանատան վնասումը սկսվել էր 2023 թվականի հոկտեմբերին, ինչպես հայտնել էր CHW-ը 2023 թվականի նոյեմբերի 27-ի ահազանգում»,- ասվում է հայտարարության մեջ։
Նշվում է, որ կազմակերպությունը ներկայացրել էր պատմական վայրի պատմությունն ու դրան սպառնացող վտանգը։
«Այդ պահին դեռ ուշ չէր դադարեցնել ավերածությունները։ Բայց 2023 թվականի դեկտեմբերին այն գրեթե անհետացել էր: Սա 2020 թվականի հրադադարից հետո ավերված երրորդ գերեզմանոցն է։ Եվս չորսը վնասվել են։ Բուլդոզերներով հայկական գերեզմանները քանդելն ադրբեջանական Ղարաբաղի հետպատերազմյան զարգացման նոր առանձնահատկությունն է՝ անհանգստացնելով նախնիներին և ջնջելով պատկանելության ու համակեցության վկայությունները»,- ասվում է հայտարարության մեջ։
Ավելի վաղ համացանցում տարածվել էին արբանյակային լուսանկարներ, որոնց համաձայն՝ Ադրբեջանն ամբողջությամբ ավերել է Արցախի հայկական Քարին տակ գյուղը։
Արբանյակային լուսանկարները նաև փաստել էին, որ 2024 թվականի փետրվարին Ադրբեջանը հողին է հավասարեցրել Շուշիի Կանաչ ժամ (Սուրբ Հովհաննես Մկրտիչ) եկեղեցին։
