08.07.2026 | 12:39
«Ռեալից» հեռացած Ալվարո Արբելոան նոր թիմ ունի
Ադրբեջանն աննախադեպ մասշտաբներով ջնջում է հայկական հետքն Արցախից. ինչ կարող է ձեռնարկել Հայաստանը․ ՏԵՍԱՆՅՈՒԹ
Քաղաքականություն
22.04.2024 | 19:30
Ադրբեջանը վերականգնման անվան տակ քանդել է Շուշիի Սուրբ Ամենափրկիչ (Ղազանչեցոց) տաճարի երկթեք ճակատներից մեկի վրայի խաչաձև լուսամուտը և դրանից վեր գտնվող պատկերաքանդակը։ Արևմտյան ճակատի քանդակը ներկայացնում էր «Խաչակիր Քրիստոսը» թեման՝ համապատասխան արձանագրությամբ։
44-օրյա պատերազմի ժամանակ ադրբեջանական ռմբակոծությունից վնասվել էր եկեղեցու նաև հարավային ճակատը՝ խաչաձև լուսամուտով հանդերձ:
«Ադրբեջանը փորձում է կեղծ վերականգնումների անվան տակ ոչնչացնել եկեղեցու պատմական ամբողջականությունը, շղթայական վնասների շարքը շարունակվում է»,-ասում է մշակութային ժառանգության փորձագետ Արմինե Տիգրանյանը:
Բոլորովին վերջերս էլ հայտնի դարձավ, որ ադրբեջանցիները հիմնահատակ քանդել են Շուշիի՝ 1818-ին կառուցված Սուրբ Հովհաննես Մկրտիչ եկեղեցին՝ Կանաչ ժամը: Ավելի վաղ ադրբեջանցիները քանդել էին Կանաչ ժամի գմբեթները՝ հայտարարելով, թե իրականում դա ուղղափառ եկեղեցի է և որպես ուղղափառ պետք է գործի։
Մասնագետների գնահատմամբ՝ սա Ադրբեջանի կողմից վերջին չորս տարում կատարված ամենամասշտաբային ոչնչացումներից է: Օրերս Արդարադատության միջազգային դատարանում «Հայաստանն ընդդեմ Ադրբեջանի» գործով լսումների ընթացքում Միջազգային իրավական հարցերով Հայաստանի ներկայացուցիչ Եղիշե Կիրակոսյանը հիշեցրեց, որ Ադրբեջանը ջնջում է Լեռնային Ղարաբաղի հայկական մշակութային ժառանգությունը՝ ընդգծելով, որ այս բոլոր հանգամանքներն են պատճառ հանդիսացել, որպեսզի Հայաստանը դիմի դատարան։
«Ադրբեջանն ի կատար ածեց տարածաշրջանի էթնիկ զտումը և այժմ փորձում է համակարգված կերպով ջնջել էթնիկ հայերի ներկայության բոլոր հետքերը, այդ թվում՝ հայկական մշակութային և կրոնական ժառանգությունը»,- նշեց նա:
«ԻԿՕՄՕՍ»-ի հայաստանյան գրասենյակի նախագահ Գագիկ Գյուրջյանից հետաքրքրվեցինք՝ ի՞նչ են անում հասարակական կազմակերպությունները՝ Արցախում հայկական հոգևոր և մշակութային ժառանգության հուշարձանների ոչնչացման, վանդալիզմի մասին բարձրաձայնելու, այդ գործընթացը գոնե մասամբ կանխելու ուղղությամբ: Նրա խոսքով՝ եթե ՀԿ-ների գործունեությունը չի շաղկապվում պետական քաղաքականության հետ, այն չի կարող արդյունավետ լինել:
Մանրամասները՝ տեսանյութում:
Աննա Բաբաջանյան
