30.04.2026 | 23:18
ՀՀ 4 քաղաքում մթնոլորտային օդում փոշու պարունակությունը գերազանցել է սահմանային թույլատրելի կոնցենտրացիան
Ադրբեջանն ամեն ինչ անում է, որ իր ձայնի իրավունքը չվերադարձվի․ ԵԽԽՎ պատգամավոր
Քաղաքականություն
17.04.2024 | 22:28
ԵԽԽՎ Ադրբեջանի պատվիրակության ձայնի իրավունքի վերադարձը հնարավոր է ԵԽ պահանջների կատարման դեպքում, սակայն Բաքուն դեռ նման ցանկություն չի ցուցաբերում։ Այս մասին ադրբեջանական Turan-ին տված հարցազրույցում հայտարարել է ԵԽԽՎ-ում Ադրբեջանի պատվիրակությանը ձայնից զրկելու որոշման նախաձեռնողներից գերմանացի պատգամավոր Ֆրանկ Շվաբեն։
«Եթե ուշադիր կարդացել եք ԵԽԽՎ հունվարյան նստաշրջանում ընդունված զեկույցը, մենք արձանագրեցինք, որ պատվիրակությունը մեկ տարով զրկվել է ձայնի իրավունքից։ Մենք պատրաստ կլինենք այլ լուծում դիտարկել, բայց միայն այն պայմանով, որ Ադրբեջանը պատրաստ կլինի ամբողջությամբ հետևել Եվրախորհրդի կանոններին։ Ցավոք, մինչ այժմ մենք հակառակն ենք տեսնում։ Բավական է նշել վերջին ամիսների իրադարձությունները՝ Toplum TV-ի լրագրողների ձերբակալությունները, շատ հիվանդ Գուբադ Իբադօղլուին ազատ արձակելուց հրաժարվելը։ Սրանք բոլորը շատ հստակ ազդանշաններ են, որոնք մենք հաշվի ենք առնում»,- ասել է պատգամավորը։
Դիտարկմանը, որ ԵԽԽՎ անդամ մի շարք երկրներ բարձրացնելու են ադրբեջանական պատվիրակության ձայնի իրավունքը վերադարձնելու հարցը, Շվաբեն պատասխանել է, որ տեղյակ է նման դիվանագիտական ճնշումների մասին։
«Սակայն ԵԽԽՎ-ն առևտրի վայր չէ, այն կազմակերպություն է, որտեղ գործում են սկզբունքներ, կանոններ և արժեքներ։ Վերջին ամիսներին մենք կրկին ականատես եղանք, որ Ադրբեջանը չի ճանաչում կամ չի պահպանում այդ կանոնները։ Ընդհակառակը, մենք տեսնում ենք հակառակ ուղղությամբ քայլեր, հատկապես այս տարվա հունվարից հետո»,- ընդգծել է Ֆրանկ Շվաբեն։
Նշենք, որ ապրիլի 15-ից մեկնարկել է ԵԽԽՎ գարնանային նստաշրջանը, որին Ադրբեջանը չի մասնակցում։ Ձմեռային նստաշրջանի ընթացքում հունվարի 24-ին ԵԽԽՎ-ն քվեարկությամբ որոշել է չվավերացնել Ադրբեջանի պատվիրակության լիազորությունները։ Այս որոշմամբ Ադրբեջանի պատվիրակությունն առնվազն մեկ տարով հեռացվել է ԵԽԽՎ-ից և կարող է վերադառնալ՝ իր կանոնադրական պարտավորությունները կատարելու դեպքում։ Ադրբեջանական պատվիրակության նկատմամբ քաղաքական պատժամիջոցներ սահմանող որոշմանը կողմ էր քվեարկել 76, դեմ՝ 10 պատգամավոր, ևս 4 խորհրդարանական ձեռնպահ էր մնացել։Այս որոշման ընդունումից հետո էլ պաշտոնական Բաքուն ակտիվ քարոզչական արշավ է իրականացնում Ֆրանկ Շվաբեի դեմ։
Էմմա Չոբանյան
