02.06.2024 | 18:57
Փրկարարները պարանների միջոցով աղետի գոտի խաղալիքներ են տեղափոխել
ՀՀ ԱԻ նախարար Հրաչյա Ռոստոմյանն ամփոփեց պաշտոնավարման 100 օրը
22.08.2018 | 16:51
Օգոստոսի 22-ին ՀՀ արտակարգ իրավիճակների նախարար Հրաչյա Ռոստոմյանը ներկայացրեց նախարարության կողմից իրականացված ծրագրերի արդյունքները, ամփոփեց պաշտոնավարման 100 օրը:
Նախարարն անդրադարձավ համակարգի հարյուրօրյա գործունեությանը, առանձնացված ստորաբաժանումների ամփոփ հաշվետվությանը, ինչպես նաև պատասխանեց զանգվածային լրատվության միջոցների ներկայացուցիչների հարցերին:
Նախարար Հ. Ռոստոմյանը նշեց, որ ավարտական փուլում են կառուցվածքային փոփոխությունները, որոնք նպաստելու են աշխատանքի առավել արդյունավետ կազմակերպմանը: Սակայն հավելեց, որ փոփոխությունների ընթացքում ծառայությունից ազատվողներ չեն եղել:
Վերջին շրջանում հետևողական աշխատանք է իրականացվել միջազգային համագործակցության մակարդակի բարձրացման ուղղությամբ՝ Հայ-ռուսական հումանիտար կենտրոնի, Ճապոնիայի միջազգային համագործակցության գործակալության (JICA), ՄԱԿ-ի Աղետների ռիսկի նվազեցման գրասենյակի և արդեն իսկ ամուր համագործակցության փուլ թևակոխած այլ գործընկերների հետ:
Ասուլիսի ընթացքում անդրադարձ եղավ նաև նախարարության առանձնացված ստորաբաժանումների՝ Հիդրոօդերևութաբանության և մթնոլորտային երևույթների վրա ակտիվ ներգործության ծառայության, Սեյսմիկ պաշտպանության տարածքային ծառայության, Տեխնիկական անվտանգության ազգային կենտրոնի ու Պետական հրդեհային և տեխնիկական անվտանգության տեսչության աշխատանքներին:
Նախարարը նշեց նաև, որ արդյունավետ փոխհամագործակցության ուղղությամբ ակտիվ աշխատանքներ են տարվում Արցախի Հանրապետության արտակարգ իրավիճակների պետական ծառայության հետ:
Անդրադառնալով ընթացիկ աշխատանքներին՝ նախարար Հ. Ռոստոմյանը նշեց, որ լայնածավալ աշխատանքներ են տարվում Երևան քաղաքի 2800 ամյակի, Ֆրանկոֆոնիայի գագաթնաժողովի, Սպիտակի երկրաշարժի 30-ամյակի կազմակերպման մասով:
Ասուլիսի ավարտին նախարարը բոլորին հրավիրեց սեպտեմբերի 4-ին ներկա գտնվել ՀՀ ԱԻՆ շքերթին և միասին նշել ԱԻՆ աշխատակցի մասնագիտական տոնը:
