22.11.2024 | 15:07
Քննարկվել է անդրազգային հանցավորության դեմ պայքարում համագործակցությունը
ՌԴ-ի հետ նույն լեզվով չենք խոսում, անհնար է թաքցնել խնդիրները․ Միրզոյան
Քաղաքականություն
31.03.2024 | 23:28
«Մենք ժողովրդավարական երկիր ենք և ցանկանում ենք ամրապնդել ժողովրդավարական ինստիտուտները։ Մենք տեսնում ենք, որ, օրինակ, Միացյալ Նահանգները և Եվրամիությունը մեր հիմնական գործընկերներն են։ Մենք նաև տեսանք, որ ԵՄ-ն պատրաստ էր քաղաքացիական առաքելություն ուղարկել, և սահմանին իրավիճակը զգալիորեն բարելավվեց»։ Այս մասին արգենտինական “Todos Noticias” հեռուստաընկերությանը տված հարցազրույցում ասել է ՀՀ ԱԳ նախարար Արարատ Միրզոյանը։
Միրզոյանը նշել է, որ անվտանգության այն մեխանիզմները, որոնք ՀՀ-ն ունեցել ՌԴ-ի հետ մի քանի տասնամյակ շարունակ, չեն աշխատել։
«Այդ իսկ պատճառով մենք պետք է խնդրեինք, որ Եվրամիությունը գար ու դիտարկեր իրավիճակը (իրադրությունը հայ-ադրբեջանական սահմանում – խմբ․)։ Այժմ մենք խորացնում ենք տնտեսական և քաղաքական հարաբերությունները Բրյուսելի և Վաշինգտոնի հետ։ Ես դա շրջադարձ չէի անվանի, մենք փորձում ենք ապահովել մեր անվտանգությունն ու զարգացումը ժողովրդավարական ճանապարհով և ինստիտուտներով, և դրա համար տեսնում ենք, որ լավ գործընկերներ կան Արևմուտքում»,- ասել է նախարարը։
Լրագրողի հարցին, թե վերոնշյալ համատեքստում ինչպե՞ս կբնութագրի Միրզոյանը Ռուսաստանի հետ հարաբերությունները, նախարարը նշել է․
«Մենք ունենք տնտեսական հարաբերություններ, երկկողմ առևտուր, համագործակցության տարբեր ոլորտներ և լավ կապեր ունենք անվտանգության առումով։ Բայց ճիշտ է նաև, որ այսօր մենք նույն մտքերը չունենք և, պարզ ասած, նույն լեզվով չենք խոսում։ Այն խնդիրները, որոնք կան Ռուսաստանի հետ հարաբերություններում, անհնար է թաքցնել»,- ասել է ԱԳՆ ղեկավարը։
