11.12.2025 | 23:40
Կոնֆերենցիաների լիգա․ «Նոան» հաղթեց «Լեգիային» ու մոտ է փլեյ-օֆֆի ուղեգրին
Մեքսիկայում առևանգել են Վրաստանի մինչև 30 քաղաքացու, որոնք փորձել են ԱՄՆ մեկնել
Քաղաքականություն
21.03.2024 | 21:02
Վրաստանի մինչև 30 քաղաքացի, որոնք փորձել են Մեքսիկայի տարածքով հասնել ԱՄՆ սահման, բռնվել են տեղի կարտելի կողմից։ Հարազատների խոսքով՝ առևանգողները 90 հազար դոլար են պահանջում պատանդներին ազատ արձակելու համար, հաղորդել են վրացական լրատվամիջոցները:
«Մթավարի» հեռուստաալիքը մեջբերում է կորածներից մեկի հաղորդագրությունը, որին թույլատրել են կապվել հարազատների հետ՝ փող խնդրելու համար։ Նա պատմել է, որ նրան ու ևս 120 գերիների պահում են նկուղում։ Ըստ ամենայնի, նրանց թվում այլ երկրների քաղաքացիներ էլ կան։
«Ինձ վրա ատրճանակ պահեցին, իսկ մյուսը դանակի պոչով հարվածեց ինձ։ Նրանք գոռում էին ինձ վրա ու ծեծում։ Ես չգիտեմ՝ ինչու»,- ասվում է նրա հաղորդագրության մեջ։
Օգնության համար առևանգվածների հարազատները դիմել են Վրաստանի ԱԳ նախարարություն։ Գերատեսչությունից հայտնել են, որ փորձում են լրացուցիչ տեղեկություններ ստանալ: Դեսպանատան միջոցով նրանք կապ են հաստատել Մեքսիկայի միգրացիայի ծառայության հետ։ Մինչ այժմ, սակայն, չի հաջողվել պարզել Վրաստանի քաղաքացիների գտնվելու վայրը։
Pirveli-ի աղբյուրները պնդում են, որ գումարի կեսը՝ 45 հազար դոլար, արդեն փոխանցվել է 15 հոգու համար։ Մնացածի համար սակարկությունները շարունակվում են։
Խնդրին ծանոթ հեռուստաալիքի զրուցակիցը կարծում է, որ չպետք է հույս դնել տեղական իշխանությունների օգնության վրա։ Նրա խոսքով՝ Վրաստանի քաղաքացիներին կարտելին են փոխանցել հենց Մեքսիկայի ներգաղթի ծառայության աշխատակիցները։
«Մենք կարող ենք վստահաբար ասել, որ կողմերը գործում են միասին։ Շատ դժվար է ասել, որ ոստիկանությունը կգա այնտեղ ու կազատի այս մարդկանց։ Դա այդպես չէ»,- ասել է Pirveli-ի անանուն զրուցակիցը։
