03.06.2026 | 00:40
Փաշինյանը Էրդողանի հետ քննարկել է Ախալքալաք–Կարս երկաթուղով Հայաստանից արտահանումների հարցը
ԵՄ-ն առաջին անգամ Ռուսաստանից և Բելառուսից հացահատիկի ներմուծման մաքսատուրք կսահմանի․ FT
Քաղաքականություն
19.03.2024 | 17:32
ԵՄ-ն պատրաստվում է Ռուսաստանից և Բելառուսից հացահատիկի ներմուծման մաքսատուրք սահմանել՝ 1 տոննայի համար 95 եվրոյի չափով՝ «ֆերմերներին ու որոշ ԵՄ երկրների հանդարտեցնելու համար»։ Այս մասին հայտնում է Financial Times-ը՝ վկայակոչելով իր աղբյուրներին, փոխանցում է DW-ի ռուսական ծառայությունը։
Նշվում է, որ նման միջոցը կլինի պարենային ապրանքների ներմուծման առաջին սահմանափակումը Ռուսաստանի կողմից Ուկրաինա լայնամասշտաբ ներխուժման մեկնարկից հետո։ Լրատվամիջոցը գրում է, որ ՌԴ-ից և Բելառուսից 1 տոննա հացահատիկի համար 95 եվրոյի չափով մաքսատուրքի ներմուծումը կհանգեցնի գների առնվազն 50%-ով բարձրացման և կտրուկ կնվազեցնի պահանջարկը։
Աղբյուրներն ասել են, որ 50 տոկոսի չափով տուրքեր կսահմանվեն նաև ձեթի սերմերի և դրանց վերամշակված մթերքների վրա։ Եվրահանձնաժողովն այս կապակցությամբ կարող է որոշում կայացնել մոտ օրերս։
FT-ն հիշեցնում է, որ Բրյուսելը երկար ժամանակ տատանվում էր նման քայլի դիմել՝ չնայած Լեհաստանի և Բալթյան երկրների ճնշմանը՝ մտավախություն ունենալով, որ նման միջոցները կարող են խաթարել պարենի համաշխարհային շուկան և հարվածել զարգացող երկրներին։
2023 թվականին Ռուսաստանից հացահատիկի, ձեթի մշակաբույսերի սերմերի և դրանց վերամշակված արտադրանքի ներմուծման ծավալը ԵՄ կազմել է 4 միլիոն տոննա։ Սա ռեկորդային մակարդակ է՝ համապատասխանում է Եվրամիությունում այդ ապրանքների սպառման ծավալի 1 տոկոսին։
«ԵՄ-ն այժմ ավելի շատ հացահատիկ է ներկրում Ռուսաստանից, քան Ուկրաինա ներխուժումից առաջ»,- նշում է լրատվամիջոցը։
Փետրվարին Լատվիան Ռուսաստանից և Բելառուսից շատ պարենային ապրանքների ներմուծման միակողմանի արգելք էր սահմանել ,իսկ Լիտվան հայտարարել է բեռների խիստ ստուգումների մասին։
Միևնույն ժամանակ, ԵՄ գյուղատնտեսության հարցերով հանձնակատար Յանուշ Վոյցեխովսկին, որը նախկինում պնդում էր, որ հացահատիկի արտահանումը Ռուսաստանից Լեհաստան «չնչին է», փոխել է իր միտքը մարտի սկզբին իր հայրենիք այցելելուց հետո, որտեղ ֆերմերներն ակտիվորեն բողոքում են։
«Եթե Ռուսաստանը սնունդն օգտագործում է որպես զենք, մենք պետք է արձագանքենք»,- ասել է նա։
Լեհաստանում ֆերմերները մի քանի շաբաթ շարունակ բողոքում են Ուկրաինայից գյուղմթերքի ներկրման դեմ։ Նրանք նշում են, որ մեծ վնասներ են կրում Բրյուսելի որոշման պատճառով՝ դադարեցնելու Ուկրաինայից գյուղատնտեսական ապրանքների ներմուծման բոլոր մաքսատուրքերը և քվոտաները։
Լրատվամիջոցը գրում է, որ ԵՄ առևտրի հարցերի հանձնակատար Վալդիս Դոմբրովսկիսը ևս, հավանաբար, կընտրի ավելի բարձր մաքսատուրքերը, քան պատժամիջոցները, քանի որ պատժամիջոցներ սահմանելու համար կպահանջվի ԵՄ անդամ բոլոր երկրների հավանությունը: Բացի այդ, պատժամիջոցների բացակայության դեպքում հնարավոր կլինի պահպանել ԵՄ տարածքով ռուսական հացահատիկի տարանցումը դեպի Աֆրիկա և Ասիա։
