Բռնաճնշումների նոր ալիք Ադրբեջանում․ տասնյակ անկախ լրագրողներ և ակտիվիստներ են ձերբակալվել

Ադրբեջանի իշխանությունները անկախ և ընդդիմադիր լրատվամիջոցների ու գործիչների նկատմամբ ճնշումների նոր ալիք են սկսել։ Նախօրեին անկախ  Toplum TV-ի խմբագրությունում տեղի ունեցած խուզարկությունն ավարտվել է տասնյակից ավելի աշխատակիցների ձերբակալմամբ։

«Տեղի ունեցածի ողջամիտ բացատրություն չկա։ Կարծես ուզում են երկրում ամբողջությամբ վերացնել անկախ լրատվամիջոցները, որպեսզի քննադատական ​​կարծիքների համար հարթակներ չմնան»,- ասել է Toplum TV-ի գլխավոր խմբագիր Խադիջա Իսմայիլովան՝ նշելով, որ կապ չունեն որևէ հանցագործության հետ և անօրինական գործողություններ չեն իրականացրել։

Բացի այդ, նախօրեին ձերբակալվել են «3-րդ Հանրապետություն» հարթակի վարչության ղեկավար Ակիֆ Գուրբանովը, համահիմնադիրներ Արազ Ալիևը և Ռուսլան Իզեթլին։ Մինչ այդ, կազմակերպության գրասենյակում խուզարկություն է կատարվել։

Անվտանգության ուժերը խուզարկել են նաև Toplum TV-ի աշխատակից Ֆարիդ Իսմայիլովի բնակարանը, ինչից հետո նրան ձեռնաշղթաներով տարել են։ Խուզարկության ընթացքում լրագրողից առգրավվել է 3100 եվրո։

Հիշեցնենք՝ 2023 թվականի դեկտեմբերի 7-ին մի խումբ հասարակական-քաղաքական ակտիվիստներ հայտարարել էին «3-րդ Հանրապետություն» հարթակի ստեղծման մասին։ Կառույցի նպատակն «Ադրբեջանում իսկական հանրապետական ​​համակարգի հաստատումն է»։ Հարթակի ղեկավար Ակիֆ Գուրբանովի փաստաբան Շահլա Գունբատովայի հաղորդմամբ՝ իր պաշտպանյալը կասկածյալի կարգավիճակ ունի։ Նրան մաքսանենգության մեղադրանքով 5-8  տարվա ազատազրկում կարող է սպառնալ։

Սոցիալական ցանցերում տարածված տեղեկությունների համաձայն՝ ձերբակալված ակտիվիտսների ու լրագրողների թիվը հասնում է շուրջ երկու տասնյակի։

Այսօր արդեն տեղեկություններ են տարածվում, որ Բաքվի ոստիկանության գլխավոր վարչությունից ազատ է արձակվել Toplum TV-ի ձերբակալված 9 աշխատակից, իսկ 6 աշխատակցի նկատմամբ քրեական գործեր են հարուցվել մաքսանենգության մեղադրանքով։ Նրանք են՝ Ֆարիդ Իսմայիլովը, Մուշֆիգ Ջաբբարովը, Ալի Զեյլնալին, Ռամիլ Բաբաևը, Էլմիր Աբասովը և Իլկին Ահմեդովը։

«3-րդ Հանրապետություն» հարթակից ազատ են արձակվել Արազ Ալիևը և Ռուսլան Իզեթլին։

Հավելենք, որ 2023 թվականի նոյեմբերից Ադրբեջանում տասնյակից ավելի անկախ և ընդդիմադիր լրագրողներ, ակտիվիստներ ու հասարակական-քաղաքական գործիչներ են ձերբակալվել, որոնց միջազգային կառույցները համարում են քաղբանտարկյալ և նրանց ազատ արձակելու կոչ են անում։

Էմմա Չոբանյան