Կամո Արեյանին կարող է «Երևանի պատվավոր քաղաքացի» կոչում շնորհվել

Երևանի ավագանու առաջիկա նիստի ընթացքում քննարկվելու է քաղաքապետի խորհրդական Կամո Արեյանին «Երևանի պատվավոր քաղաքացի» կոչում շնորհելու հարցը։

Նախագիծը դեռ չի հրապարակվել քաղաքապետարանի կայքէջում, սակայն ուղարկվել է ավագանու անդամներին։

Քաղաքապետ Տիգրան Ավինյանի հեղինակած նախագծի հիմնավորման մեջ նշված է, որ Կամո Արեյանին «Երևանի պատվավոր քաղաքացի» կոչում շնորհելը պայմանավորված է Երևան քաղաքի զարգացման գործում ներդրած նշանակալի ավանդով և քաղաքի բարօրությանն ու բարգավաճմանը միտված երկարամյա գործունեությամբ։

Նախագիծը կընդունվի, եթե առաջիկա նիստին ավագանու անդամների մեծամասնությունը կողմ քվեարկի։

Նշենք, որ 67-ամյա Արեյանի աշխատանքային գործունեության մեծ մասն անցել է Երևանի քաղաքապետարանում։ 1997-2001 թվականներին նա զբաղեցրել է Երևանի քաղաքապետի տեղակալի պաշտոնը, 1998 թվականին երեք ամսով եղել է Երևանի քաղաքապետի պաշտոնակատար։ Այնուհետև հեռացել է քաղաքապետարանից՝ նշանակվելով ՏԿԵ նախարարի տեղակալ։ Երկու տարի անց կրկին վերադարձել է քաղաքապետարան որպես Երևանի քաղաքապետի առաջին տեղակալ: 2009-ի հուլիսի 6-ին Երևան քաղաքի ավագանու որոշմամբ նշանակվել է Երևանի քաղաքապետի տեղակալ: Կամո Արեյանի՝ Երևանի քաղաքապետարանի կայքէջում հրապարակված կենսագրության համաձայն նա Հանրապետական կուսակցության անդամ է, իսկ 2013 թվականի մայիսի 5-ին ՀՀԿ համամասնական ցուցակով ընտրվել է Երևանի ավագանու անդամ և զբաղեցրել Երևանի փոխքաղաքապետի պաշտոնը։ 2013թ. հունիսի 15-ին Երևանի ավագանու նիստում նշանակվել է Երևանի քաղաքապետի առաջին տեղակալ՝ այս պաշտոնում մնալով մինչև 2018 թվականը։ 2018 թվականին նորընտիր քաղաքապետ Հայկ Մարությանի որոշմամբ Կամո Արեյանը նշանակվել է Երևանի քաղաքապետի խորհրդական: 2018 թվականից ի վեր Երևանը 3 քաղաքապետ է փոխել, բայց Կամո Արեյանը շարունակել է մնալ քաղաքապետի խորհրդական։

Կամո Արեյանը պարգևատրվել է «Հայրենիքին մատուցած ծառայությունների համար» 2-րդ աստիճանի մեդալով, Անանիա Շիրակացու մեդալով, Հայաստանի Հանրապետության Ազգային ժողովի պատվո մեդալով, Հայաստանի Հանրապետության վարչապետի հուշամեդալով, «Երևանի զինանշան» և «Ֆրիտյոֆ Նանսեն» հուշամեդալներով, «Սպարապետ Վազգեն Սարգսյան» շքանշանով, «ԵԿՄ 20 տարի» հոբելյանական մեդալով, «Համագործակցություն հանուն փրկության» մեդալով։

Արփի Հակոբյան